21 лістапада, Мінск /Кар. БЕЛТА/. Намеснік міністра замежных спраў Беларусі Яўген Шэстакоў 21 лістапада, наведваючы з візітам Аб'яднаныя Арабскія Эміраты, правёў перагаворы з першым намеснікам міністра замежных спраў і міжнароднага супрацоўніцтва ААЭ Халідам Бельгулем. Аб гэтым БЕЛТА паведамілі ў прэс-службе МЗС Беларусі.
Асобную ўвагу на сустрэчы дыпламаты ўдзялілі консульскай сферы. Субяседнікі закранулі пытанні хутчэйшага завяршэння ўнутрыдзяржаўных працэдур па ратыфікацыі пратакола аб увядзенні бязвізавага рэжыму, абмеркавалі магчымасць узаемнага прызнання вадзіцельскіх пасведчанняў, узаемнае аказанне юрыдычнай дапамогі і іншыя пытанні, якія маюць інтарэс для абодвух бакоў.
"У час перагавораў абмеркаваны пытанні двухбаковага супрацоўніцтва, уключаючы вынікі нядаўна праведзеных візітаў на вышэйшым узроўні. Бакі станоўча ацанілі развіццё палітычных кантактаў, а таксама адзначылі рост тавараабароту паміж дзвюма краінамі", - адзначылі ў міністэрстве. Намечаны далейшыя крокі па развіцці беларуска-эмірацкіх адносін, уключаючы ўзаемадзеянне профільных ведамстваў па консульскіх пытаннях.
Па выніках 2018 года аб'ём беларуска-эмірацкага гандлю склаў $72,3 млн, беларускі экспарт - $58 млн. У студзені - верасні бягучага года тавараабарот з ААЭ дасягнуў $86,7 млн, з іх беларускі экспарт - амаль $72 млн.-0-
