14 жніўня, Мінск /Кар. БЕЛТА/. Па ініцыятыве швейцарскага боку адбылася тэлефонная размова міністра замежных спраў Беларусі Уладзіміра Макея з членам Федэральнага савета, кіраўніком Федэральнага дэпартамента замежных спраў Швейцарскай Канфедэрацыі Іньяцыа Касісам. Аб гэтым БЕЛТА паведамілі ў прэс-службе МЗС Беларусі.
"У цэнтры ўвагі знаходзіліся праведзеныя выбары Прэзідэнта Рэспублікі Беларусь і актуальная сітуацыя ў нашай краіне. Уладзімір Макей выказаў удзячнасць швейцарскаму боку за забеспячэнне бяспекі і парадку ў час галасавання на выбарчым участку ў пасольстве Беларусі ў Швейцарыі", - расказалі ў прэс-службе ведамства.
Беларускі бок адзначыў гатоўнасць да канструктыўнага і аб'ектыўнага дыялогу з замежнымі партнёрамі па ўсіх пытаннях, звязаных з развіццём падзей у Беларусі ў час выбарчай кампаніі і пасля яе завяршэння.
"Бакі пацвердзілі ўзаемную зацікаўленасць у прадаўжэнні паспяховага развіцця беларуска-швейцарскіх адносін", - дадалі ў МЗС.-0-
