Аляксей Багданаў
14 студзеня, Мінск /Кар. БЕЛТА/. Беларусь мае намер прапанаваць Казахстану праводзіць форумы рэгіёнаў па аналогіі з тымі, якія арганізуюць Беларусь і Расія. Аб гэтым заявіў журналістам пасол Беларусі ў Казахстане Аляксей Багданаў, назначаны 14 студзеня на гэту пасаду кіраўніком дзяржавы, перадае карэспандэнт БЕЛТА.
Паводле слоў дыпламата, Прэзідэнт, прымаючы кадравыя рашэнні і гаворачы пра развіццё супрацоўніцтва з Казахстанам, задаў вектар, які патрабуе асаблівай увагі, і гэта - узаемадзеянне з рэгіёнамі Казахстана. "Вядома, неабходна прыкласці шмат намаганняў для таго, каб гэта рэалізаваць. Мы нядрэнна ведаем сталіцу (як дзеючую, так і паўднёвую, Алма-Аты), але рушыць далей у нас пакуль не так і добра атрымалася. У гэтым напрамку трэба працаваць", - сказаў дыпламат.
"Магчыма, мы створым які-небудзь фармат работы накшталт форуму рэгіёнаў, які ёсць з Расійскай Федэрацыяй, - прадоўжыў ён. - Такую прапанову будзем абавязкова ўносіць кіраўніцтву Казахстана. Паколькі мы бачым станоўчы эфект ад нашага рэгіянальнага ўзаемадзеяння з брацкай Расіяй. Вядома, з брацкай Рэспублікай Казахстан таксама будзем узмацняць такое ўзаемадзеянне".
"Сёння геапалітычна вельмі складана нашым краінам выжываць - нас стараюцца раз'яднаць, адарваць адзін ад аднаго. Таму задача ў тым, каб захаваць культурнае, гістарычнае ўзаемадзеянне і на базе гэтых моцных сувязей, якія нас духоўна аб'ядноўваюць, павялічыць тавараабарот", - дадаў Аляксей Багданаў.
Ён звярнуў увагу, што Казахстан уваходзіць у дзясятку буйнейшых пакупнікоў беларускіх тавараў у свеце. З 2021 года тавараабарот дзвюх краін перасягае $1 млрд. Аднак беларускі экспарт на працягу некалькіх гадоў трымаецца на ўзроўні $800-900 млн, і, паводле слоў дыпламата, яго неабходна нарасціць да $1 млрд, такая задача пастаўлена кіраўніком дзяржавы. Зрабіць гэта плануецца за кошт павелічэння паставак харчовай прадукцыі, развіваючы дылерскую сетку, і прамысловай кааперацыі.
"Неабходна развіваць нашы зборачныя вытворчасці, якія там (у Казахстане. - Заўвага БЕЛТА) прысутнічаюць. Не толькі гандляваць, але і сумесна вырабляць машыны. Вельмі нядрэнна працуюць "Гомсельмаш", Мінскі трактарны завод (тры зборачныя пункты ў нас там прысутнічаюць). Неабходна актывізаваць работу МАЗа, "Магілёўліфтмаша", іншых прадпрыемстваў, якія цікавы для нашых калег", - сказаў пасол. У гэтым плане ён таксама падкрэсліў шырокія магчымасці для рээкспарту сумесна вырабленай прадукцыі ў трэція краіны.-0-
Падпісвайцеся на нас у
