Сцяг Пятніца, 29 сакавіка 2024
Усе навіны
Усе навіны
Палітыка
21 верасня 2022, 16:13

Апараты саветаў бяспекі Беларусі і Расіі выпрацавалі механізмы процідзеяння выклікам і пагрозам

21 верасня, Масква /Эдуард Півавар - БЕЛТА/. Апараты саветаў бяспекі Беларусі і Расіі выпрацавалі механізмы процідзеяння выклікам і пагрозам. Аб гэтым паведаміў журналістам дзяржаўны сакратар Савета бяспекі Беларусі Аляксандр Вальфовіч пасля праведзенай сёння ў Маскве сустрэчы з сакратаром Савета бяспекі Расіі Мікалаем Патрушавым і кансультацый па лініі апаратаў саветаў бяспекі дзвюх краін, перадае карэспандэнт БЕЛТА.

"Абмеркаваны шырокі спектр пытанняў, звязаных перш за ўсё з бяспекай Саюзнай дзяржавы ва ўмовах гібрыдных пагроз, дзеянняў Захаду ў адносінах да Расійскай Федэрацыі і Рэспублікі Беларусь, - сказаў Аляксандр Вальфовіч. - Зразумела, нас не маглі не хваляваць пытанні, звязаныя з правядзеннем спецыяльнай ваеннай аперацыі, з тымі выклікамі і пагрозамі, якія Захад праз тэрыторыю Украіны спрабуе давесці да граніц Саюзнай дзяржавы і той напружанай абстаноўкай, якая сапраўды складваецца на граніцах Саюзнай дзяржавы. Нашымі апаратамі выпрацаваны шэраг механізмаў процідзеяння гэтым выклікам і пагрозам, таму што бяспека нашых краін, нашых грамадзян - гэта галоўная задача для кіраўнікоў краін, для саветаў бяспекі".

Паводле яго слоў, былі разгледжаны таксама пытанні, звязаныя з біялагічнай бяспекай. "Гэта новая пагроза сёння, яна адлюстравана, дарэчы, у праекце новай Канцэпцыі нацыянальнай бяспекі, якая ў бліжэйшы час будзе даведзена да членаў Савета бяспекі Беларусі і потым вынесена для зацвярджэння на Усебеларускі народны сход", - адзначыў дзяржсакратар.

Бакі абмеркавалі таксама неабходнасць канцэптуалізацыі дакументаў стратэгічнага планавання Саюзнай дзяржавы, у прыватнасці Канцэпцыі нацыянальнай бяспекі Саюзнай дзяржавы. "Трэба асвяжаць гэты дакумент, таму што дзеючы дакумент 1999 года зыходзячы з рэалій сучаснасці патрабуе ўнясення пэўных змяненняў", - удакладніў Аляксандр Вальфовіч.

"Абмеркаваны іншыя механізмы работы і ўзаемадзеяння саветаў бяспекі. Адзначана таксама высокае ўзаемадзеянне нашых апаратаў, а таксама тое, што дасягнута высокае ўзаемадзеянне па лініі сілавых ведамстваў дзвюх краін - міністэрстваў абароны, КДБ і ФСБ, органаў пагранічнай службы і іншых структур сілавога блока, накіраваных на вырашэнне пытанняў, звязаных з сучаснымі выклікамі і пагрозамі ва ўмовах беспрэцэдэнтнага геапалітычнага націску з боку Захаду ў адносінах да Саюзнай дзяржавы", - падкрэсліў дзяржсакратар.

"Кансультацыі прайшлі канструктыўна, на высокім узроўні, так, як павінны праходзіць кансультацыі паміж дзвюма дружалюбнымі брацкімі краінамі", - дадаў Аляксандр Вальфовіч.-0-

Падпісвайцеся на нас у
Twitter
Топ-навіны
Свежыя навіны Беларусі