19 снежня, Масква /Эдуард Півавар - БЕЛТА/. Парламенцкі сход Саюза Беларусі і Расіі ўзмоцніць кантроль за выкананнем 28 інтэграцыйных праграм, якія былі зацверджаны ў лістападзе 2021 года рашэннем Вышэйшага дзяржаўнага савета Саюзнай дзяржавы. Аб гэтым заявіў журналістам старшыня Палаты прадстаўнікоў Нацыянальнага сходу Беларусі Уладзімір Андрэйчанка па выніках праведзенай сёння ў Маскве сесіі Парламенцкага сходу, перадае карэспандэнт БЕЛТА.
"Час паказаў, што давяраць нашым заходнім так званым партнёрам і амерыканцам у палітыцы і гандлі нельга. Таму кіраўнікі нашых дзяржаў выбралі адзіную эфектыўную мадэль супрацоўніцтва паміж Беларуссю і Расіяй. І вынікі года сведчаць аб тым, што ў нас гандлёва-эканамічнае супрацоўніцтва развіваецца паспяхова. Дастаткова сказаць, што па выніках гэтага года гандлёвы абарот дасягне амаль $44-45 млрд. Гэта рэкордны паказчык", - адзначыў Уладзімір Андрэйчанка.
На сесіі быў разгледжаны ход рэалізацыі 28 інтэграцыйных праграм, якія былі зацверджаны рашэннем Вышэйшага дзяржсавета Саюзнай дзяржавы ў лістападзе 2021 года. "І калі па выніках паўгоддзя было рэалізавана каля 30 працэнтаў, то на сённяшні дзень рэалізацыя складае 60 працэнтаў", - канстатаваў старшыня Палаты прадстаўнікоў.
"Але трэба прызнаць, што ёсць і праблемы. Пакуль не ўсё ў нас гладка ў саюзным будаўніцтве, ёсць недахопы, ёсць пралікі, па асобных праграмах сарваны тэрміны выканання. Таму мы сёння дамовіліся ўзмацніць парламенцкі кантроль за рэалізацыяй гэтых праграм", - сказаў Уладзімір Андрэйчанка.
Таксама саюзныя парламентарыі прынялі праект бюджэту Саюзнай дзяржавы на 2023 год. "Перш за ўсё мы прынялі рашэнне ўзмацніць патрабаванні да складання і расходавання бюджэту Саюзнай дзяржавы. На наступны год запланавана рэалізацыя чатырох праграм і 33 мерапрыемстваў. Бюджэт складзе 5 млрд 966 млн расійскіх рублёў", - дадаў Уладзімір Андрэйчанка.-0-
