22 верасня, Мінск /Кар. БЕЛТА/. Беларусь зацікаўлена ў развіцці двухбаковых адносін з Малдовай. Аб гэтым заявіў сёння старшыня Палаты прадстаўнікоў Уладзімір Андрэйчанка ў час сустрэчы з Надзвычайным і Паўнамоцным паслом Малдовы ў Беларусі Віктарам Сарачанам у Палаце прадстаўнікоў, перадае карэспандэнт БЕЛТА.
Бакі абмеркавалі міжпарламенцкае супрацоўніцтва, а таксама развіццё двухбаковых адносін Беларусі і Малдовы. "На жаль, сённяшняя сустрэча звязана з завяршэннем дыпламатычнай місіі ў Беларусі Віктара Васільевіча. Хачу выказаць шчырую ўдзячнасць за вашу працу. За пяць гадоў вашай работы паслом было зроблена многае па ўмацаванні сувязей практычна па ўсіх напрамках дзейнасці, - сказаў Уладзімір Андрэйчанка, звяртаючыся да пасла. - За гэтыя гады намеціўся знешнегандлёвы абарот звыш $200 млн. Значна палепшыліся міжрэгіянальныя сувязі, нашы людзі ведаюць вас ва ўсіх рэгіёнах краіны. З вашага боку быў унесены вялікі ўклад ва ўмацаванне кантактаў паміж прэзідэнтамі і ўрадамі нашых краін, міжнароднымі арганізацыямі".
fff1
Нягледзячы на пандэмію, спікер звярнуў увагу, Віктар Сарачан арганізаваў у гэтым годзе візіт парламенцкай дэлегацыі Малдовы ў Беларусь.
"Важна, што мы падпісалі сумесную заяву аб супрацоўніцтве паміж Нацыянальным сходам Беларусі і парламентам Малдовы. Упэўнены, што дакумент будзе працаваць на развіццё ўзаемадзеяння паміж нашымі краінамі, самае галоўнае - на карысць нашых людзей", - адзначыў старшыня Палаты прадстаўнікоў.
Уладзімір Андрэйчанка таксама нагадаў, што ў Мінску 6 мая быў адкрыты помнік малдаўскаму воіну Герою Савецкага Саюза Іону Солтысу. Бронзавы бюст устанавілі на скрыжаванні вуліц Ваўпшасава і Солтыса па ініцыятыве малдаўскай дыяспары і пры падтрымцы пасольства Малдовы ў Беларусі. "Гэта яшчэ раз сведчыць аб тым, што мы разам здабывалі перамогу ў Вялікай Айчыннай вайне, працавалі на аднаўленне краін у пасляваенны час, - падкрэсліў ён. - Важна, каб нашы двухбаковыя адносіны прадаўжалі развівацца, у чым мы зацікаўлены і будзем рабіць усё для гэтага".
У сваю чаргу Віктар Сарачан падзякаваў Беларусі за высокую ацэнку сваёй працы і цёплы прыём. "Нашы краіны павінны быць разам. У нас ёсць больш за 90 прадпрыемстваў з сумесным капіталам. У Малдове паспяхова працуюць зборачныя вытворчасці беларускіх тралейбусаў і трактароў, - канстатаваў ён. - Я бачу кааперацыю асноўным рухавіком у развіцці гандлёва-эканамічных адносін дзвюх краін. Гэта доўгатэрміновыя праекты, якія будуць дзейнічаць многія гады".
Пасол дадаў, што краіны звязваюць не толькі эканамічныя адносіны, але і агульная гістарычная памяць. "Я ўдзячны за аказаную дапамогу ў зборы зямлі з месцаў пахавання малдаўскіх воінаў. Паводле афіцыйных даных, прадастаўленых Нацыянальным архівам Беларусі, тут пахаваны 80 чалавек. Мы стварылі дзве капсулы з зямлёй: адну перадалі ў Кішынёў , а другую заклалі ў Храме-помніку ў гонар Усіх Святых напярэдадні Дня Перамогі", - сказаў ён на заканчэнне.-0-
