Сцяг Аўторак, 16 красавіка 2024
Усе навіны
Усе навіны
Палітыка
09 сакавіка 2023, 12:58

Алейнік: ШАС з'яўляецца адной з апор шматпалярнага свету, і нам важна быць паўнапраўным членам арганізацыі

9 сакавіка, Мінск /Кар. БЕЛТА/. Шанхайская арганізацыя супрацоўніцтва - адна з апор шматпалярнага свету, і для Беларусі важна стаць паўнапраўным членам арганізацыі. Аб гэтым заявіў міністр замежных спраў Сяргей Алейнік па выніках сустрэчы Прэзідэнта Беларусі Аляксандра Лукашэнкі з генеральным сакратаром ШАС Чжан Мінам, перадае карэспандэнт БЕЛТА.

Цяперашні статус Беларусі ў якасці наглядальніка ШАС, на думку міністра, не дае магчымасці паўнацэнна ўдзельнічаць ва ўсіх фарматах арганізацыі. Напрыклад, пасяджэнні Савета міністраў замежных спраў праходзяць з удзелам толькі дзяржаў - членаў ШАС. Тое ж датычыцца іншых фарматаў у сферы бяспекі, абароны, эканомікі, міжбанкаўскага ўзаемадзеяння. "Паўнапраўнае членства адкрые для нас больш шырока дзверы ў гэту арганізацыю і дасць магчымасць нам паўнацэнна і паўнапраўна ўдзельнічаць ва ўсіх без выключэння фарматах арганізацыі. Мы бачым у гэтым сур'ёзныя перспектывы не толькі для эканамічнага супрацоўніцтва, але і для палітыка-дыпламатычнага ўзаемадзеяння. Гэта вельмі важна сёння, таму што ШАС з'яўляецца адной з асноўных апор шматпалярнага свету. Вельмі важна быць уключанымі ў працэсы ўмацавання шматпалярнасці з пазіцыі ШАС. Тое ж датычыцца і культурна-гуманітарнага вымярэння".

Міністр падкрэсліў, што Беларусь надае вельмі важнае значэнне развіццю супрацоўніцтва з ШАС. Яно пачалося з 2010 года, з узаемадзеяння Беларусі ў якасці партнёра па дыялогу. У 2015 годзе павысілі статус да наглядальніка, а ў 2022 годзе пададзена афіцыйная заяўка на ўступленне Беларусі ў якасці раўнапраўнага члена ШАС. "Гэта заяўка была ў паскораным парадку, на працягу двух з паловай месяцаў, разгледжана і на палітычным узроўні зацверджана на саміце кіраўнікоў дзяржаў ШАС у верасні 2022 года ў Самаркандзе. Пасля гэтага мы актыўна ўключыліся ў працэс юрыдычнага афармлення нашага паўнапраўнага членства. Было праведзена мноства раўндаў кансультацый з дзяржавамі - членамі ШАС, сакратарыятам арганізацыі. У студзені 2023 года падпісаны пратакол па пытаннях далучэння Беларусі да ШАС, які вызначае механізмы нашага далучэння, падрыхтаваны мемарандум", - растлумачыў кіраўнік МЗС. Паводле яго слоў, цяпер у штатным рэжыме ідзе працэс узгаднення гэтага мемарандума з дзяржавамі - членамі ШАС. "Мы прытрымліваемся паскоранага фармату далучэння. Ёсць тэхнічныя моманты, якія мы рэгулюем з дзяржавамі - членамі ШАС, і разлічваем завяршыць гэты працэс у 2023 годзе", - адзначыў ён.

Сяргей Алейнік падкрэсліў, што Беларусь заўсёды актыўна праяўляла сябе ў ШАС ва ўсіх вымярэннях работы арганізацыі: палітыка-дыпламатычным, гандлёва-эканамічным і культурна-гуманітарным. Паколькі 70 працэнтаў тавараабароту нашай краіны прыпадае на краіны ШАС.

"Мы бачым вялікія перспектывы і патэнцыял гэтага супрацоўніцтва, разлічваем актыўна ўдзельнічаць ва ўсіх вымярэннях, не толькі ў гандлі, але і ў прамысловай кааперацыі, цяпер на парадак дня арганізацыі выходзяць пытанні прамысловасці, энергетыкі, ёсць міжбанкаўскае ўзаемадзеянне, фарміруюцца альтэрнатыўныя варыянты разлікаў, якія вельмі важны для пераадолення незаконных абмежавальных мер, што прымяняюцца краінамі Захаду. Ёсць вялікая работа ў галіне транспарту і выбудоўвання транзітна-лагістычных ланцужкоў", - звярнуў увагу міністр.

Ён перакананы, што далучэнне Беларусі да ШАС у якасці паўнапраўнага члена надасць новы імпульс развіццю арганізацыі і супрацоўніцтву з яе ўдзельнікамі. Паколькі наша краіна на міжнародных пляцоўках заўсёды імкнецца актыўна праяўляць сябе, выступае з ініцыятывамі. Напрыклад, Прэзідэнтам Беларусі было ініцыявана правядзенне сумеснага саміту АДКБ і ШАС па сітуацыі ў Афганістане ў 2021 годзе. "Гэта з'яўляецца добрым прыкладам таго, як беларускія ініцыятывы знаходзяць адлюстраванне ў рабоце арганізацыі", - адзначыў міністр.-0-

Падпісвайцеся на нас у
Twitter
Топ-навіны
Свежыя навіны Беларусі