14 красавіка, Мінск /Кар. БЕЛТА/. Беларусь удзячная індыйскаму боку за нязменную падтрымку на міжнароднай арэне. Гэта падкрэсліў першы намеснік міністра замежных спраў Рэспублікі Беларусь Сяргей Алейнік 13 красавіка ў час святочнага мерапрыемства, прысвечанага 30-годдзю ўстанаўлення дыпламатычных адносін паміж Рэспублікай Індыя і Рэспублікай Беларусь, паведамляе карэспандэнт БЕЛТА.
Сяргей Алейнік звярнуў увагу на эфектыўнае развіццё двухбаковага супрацоўніцтва ў палітычнай сферы: "На ўзроўні кіраўніцтва Беларусі і Індыі падтрымліваецца рэгулярны палітычны дыялог. Прэзідэнт Беларусі тройчы наведваў Індыю з дзяржаўнымі візітамі і неаднаразова сустракаўся з прэм'ер-міністрам Індыі на палях розных міжнародных мерапрыемстваў".
"Беларусь удзячная індыйскаму боку за нязменную падтрымку нашых пазіцый на міжнароднай арэне і заўсёды адказвае ўзаемнасцю на аналагічныя просьбы нашых індыйскіх сяброў", - прадоўжыў першы намеснік міністра замежных спраў Рэспублікі Беларусь.
Беларусь і Рэспубліка Індыя адзначаюць 30-годдзе ўстанаўлення дыпламатычных адносін. З нагоды гэтай даты пасольства Рэспублікі Індыя ў Мінску арганізавала канцэрт "Падарожжа па Індыі і Беларусі" ў Палацы культуры прафсаюзаў. На мерапрыемстве прысутнічалі кіраўнікі дыпламатычных місій і міжнародных арганізацый, прадстаўнікі розных міністэрстваў, ведамстваў, устаноў адукацыі, індыйскай дыяспары.-0-