26 мая, Мінск /Кар. БЕЛТА/. Беларусь ганарыцца тым, што шэраг беларусаў стаялі ля вытокаў ізраільскай дзяржаўнасці. Гэта адзначыў першы намеснік міністра замежных спраў Сяргей Алейнік на вечары ў Доме дружбы ў сувязі з 30-годдзем устанаўлення дыпадносін паміж Беларуссю і Ізраілем, перадае карэспандэнт БЕЛТА.
"Сёння для Беларусі і Ізраіля асаблівы дзень - мы адзначаем 30-годдзе ўстанаўлення дыпламатычных адносін, - сказаў Сяргей Алейнік. - На працягу гэтага часу Беларусь і Ізраіль падтрымліваюць традыцыйна дружалюбныя, цёплыя і адкрытыя адносіны. Цеснае перапляценне чалавечых лёсаў і культур у гістарычнай рэтраспектыве з'яўляецца трывалай асновай дружалюбных і партнёрскіх сувязей, якія склаліся паміж краінамі".
"Цяжка знайсці іншую такую краіну ў далёкім замежжы, як Ізраіль, дзе б цэлая плеяда нашых суайчыннікаў адыграла выдатную ролю ў дзяржаўным кіраванні, развіцці навукі, эканомікі, мастацтва. Беларусь ганарыцца тым, што шэраг беларусаў стаялі ля вытокаў ізраільскай дзяржаўнасці, падпісалі Дэкларацыю незалежнасці Ізраіля і ўнеслі свой уклад у яго станаўленне і развіццё", - падкрэсліў Сяргей Алейнік.
Вось што пісаў дзявяты прэзідэнт Ізраіля, выхадзец з беларускага Вішнева Шымон Перэс у біяграфіі першага прэзідэнта Ізраіля Хаіма Вейцмана, ураджэнца мястэчка Моталь: "Ізраіль нарадзіўся ў Беларусі. Большасць нашых вялікіх дзеячаў, пісьменнікаў і мастакоў пачыналі сваё жыццё ў беларускай калысцы. З маленькіх вёсак прыйшлі вялікія летуценнікі і вялікія лідары. Мы ўдзячныя вам за гэта".-0-
