16 кастрычніка, Масква /Эдуард Півавар - БЕЛТА/. Пасяджэнне Групы высокага ўзроўню Савета міністраў Саюзнай дзяржавы адбудзецца 20 кастрычніка ў рэжыме відэаканферэнцыі, паведамілі БЕЛТА ў Пастаянным камітэце Саюзнай дзяржавы.
Парадак дня пасяджэння ахоплівае шырокае кола пытанняў беларуска-расійскага супрацоўніцтва. У ім ёсць пытанні, якія датычацца работы над праектам канцэпцыі збліжэння заканадаўства дзяржаў - удзельніц Дагавора аб стварэнні Саюзнай дзяржавы, інтэграцыі інфармацыйных сістэм у сферы фітасанітарнага кантролю Беларусі і РФ, выканання мерапрыемстваў дарожнай карты па рэалізацыі рэзалюцыі Вышэйшага дзяржаўнага савета Саюзнай дзяржавы ад 30 чэрвеня 2017 года нумар 3 па пытанні аб адмене роўмінгу на тэрыторыі Саюзнай дзяржавы. Плануецца таксама разгледзець зняцце абмежаванняў на перамяшчэнне праз беларуска-расійскую граніцу, узаемнае прызнанне банкаўскіх гарантый пры ажыццяўленні дзяржаўных (муніцыпальных) закупак, тэхнічныя бар'еры доступу беларускіх прадпрыемстваў да электронных гандлёвых пляцовак у РФ, перспектывы распрацоўкі і ход узгаднення новых канцэпцый праграм Саюзнай дзяржавы, стан прапрацоўкі праекта будаўніцтва высакаскораснай грузапасажырскай чыгуначнай магістралі "Санкт-Пецярбург - Мінск - Варшава - Гамбург".
"Таксама ў мэтах каардынацыі работы па падрыхтоўцы і правядзенні ў бягучым годзе пасяджэнняў вышэйшых органаў Саюзнай дзяржавы запланаваны разгляд пытання аб праектах парадкаў дня чарговых пасяджэнняў Савета міністраў і Вышэйшага дзяржаўнага савета Саюзнай дзяржавы", - адзначылі ў Пастаянным камітэце.
У пасяджэнні Групы высокага ўзроўню прымуць удзел яе сустаршыні - віцэ-прэм'ер Расіі Аляксей Авярчук і пасол Беларусі ў РФ, надзелены паўнамоцтвамі намесніка прэм'ер-міністра Уладзімір Сямашка, а таксама дзяржаўны сакратар Саюзнай дзяржавы Рыгор Рапота, пасол Расіі ў Беларусі Дзмітрый Мезенцаў, адказны сакратар Парламенцкага сходу Саюза Беларусі і Расіі Сяргей Стрэльчанка, кіраўнікі галіновых беларускіх і расійскіх міністэрстваў, адказныя работнікі Пастаяннага камітэта Саюзнай дзяржавы.-0-
