18 красавіка, Мінск /Кар. БЕЛТА/. Адбылася тэлефонная размова прэм'ер-міністра Беларусі Рамана Галоўчанкі са старшынёй урада Расійскай Федэрацыі Міхаілам Мішусціным, паведамляе БЕЛТА са спасылкай на Telegram-канал прэс-службы ўрада.
Прэм'ер-міністры абмеркавалі актуальныя задачы па пашырэнні расійска-беларускага гандлёва-эканамічнага супрацоўніцтва ва ўмовах эканамічных санкцый, уведзеных недружалюбнымі дзяржавамі. Асноўная ўвага была ўдзелена рэалізацыі сумесных праектаў у сферы энергетыкі, прамысловасці, транспартнай інфраструктуры і іншых галінах.
Раман Галоўчанка і Міхаіл Мішусцін таксама абмеркавалі пытанні практычнай рэалізацыі дамоўленасцей, дасягнутых прэзідэнтамі Беларусі і Расіі ў ходзе сустрэчы на касмадроме Усходні 12 красавіка бягучага года.
Бакі яшчэ раз падкрэслілі нацэленасць на аператыўнае вырашэнне ўсіх пытанняў у рамках Саюзнай дзяржавы і Еўразійскага эканамічнага саюза.-0-