Жадаючым пасеяць сярод беларусаў нянавісць павінен быць дадзены жорсткі адказ. Такое меркаванне ў эфіры тэлеканала "Беларусь 1" выказаў старшыня Пастаяннай камісіі па адукацыі, культуры і навуцы Палаты прадстаўнікоў Ігар Марзалюк.
Парламентарый перасцярог: "Нянавісць на вуліцах, множанне нянавісці ў грамадстве - гэта прамая дарога да грамадзянскай вайны". "Мы павінны зрабіць усё магчымае і немагчымае, каб купіраваць усё, што адбываецца, і даць жорсткі адказ тым, хто хоча пасеяць сярод беларусаў нянавісць, тым, хто будзе нажывацца на крыві, слязах і горы беларускіх маці", - сказаў ён.
Сюжэт на "Беларусь 1" прысвячаўся сітуацыі ў Мінску, дзе пратэстуючыя другі дзень учыняюць масавыя беспарадкі. Міліцыя спыняе ўсе спробы правакатараў. У панядзелак, 10 жніўня, у горад выйшлі агрэсіўна настроеныя людзі, на вуліцы Прытыцкага яны сталі будаваць барыкады. У час процістаяння са спецназам, які прыбыў для дэблакіравання плошчы, каля 23.00 адзін з пратэстуючых спрабаваў кінуць неўстаноўленае выбуховае ўстройства ў бок праваахоўнікаў. Яно ўзарвалося ў руцэ мужчыны. У выніку ён атрымаў траўмы, несумяшчальныя з жыццём. Загінулы 33-гадовы мінчанін раней адбываў тэрмін за забойства чалавека.
Напярэдадні ў Мінску адбылося некалькі жорсткіх сутыкненняў паміж удзельнікамі беспарадкаў і праваахоўнікамі. Пратэстуючыя кідалі ў супрацоўнікаў міліцыі бутэлькі з запальнай сумессю, кускі тратуарнай пліткі, абстрэльвалі іх феерверкамі. У сваю чаргу вартавыя парадку рабілі ўсё магчымае, каб уціхамірыць агрэсіўна настроеных людзей. Не абышлося без пацярпелых як з аднаго, так і з другога боку.
Яшчэ адным месцам, дзе напярэдадні прайшлі масавыя беспарадкі, стала пляцоўка перад гандлёвым цэнтрам "Рыга". Там пратэстуючыя для больш выгаднага становішча і атакі міліцыянераў узвялі барыкады. Менавіта з такіх канструкцый стаў развівацца палатачны лагер у час украінскага майдана, адзначылі на "Беларусь 1". Сутычкі мітынгуючых з праваахоўнікамі былі зафіксаваны ў раёне плошчы Бангалор. Беспарадкі прайшлі і ў іншых гарадах краіны. Сцэнарый ва ўсіх выпадках быў прыкладна аднолькавы: каардынатары настройваюць пратэстуючых на правакацыі, потым узводзяцца барыкады. Пасля праваахоўнікаў пачынаюць закідваць кактэйлямі Молатава (зафіксаваны і такія выпадкі), камянямі і тратуарнай пліткай. У Мінску на атрад АМАПа быў учынены наезд легкавым аўтамабілем, ён урэзаўся ў рады праваахоўнікаў.
Следчы камітэт узбудзіў 21 крымінальную справу па фактах масавых беспарадкаў і насілля ў адносінах да супрацоўнікаў органаў унутраных спраў у ноч з 9 на 10 жніўня ў Мінску і іншых гарадах краіны. Па падазрэнні ва ўчыненні злачынстваў затрыманы больш за 80 чалавек. Большасць з іх - маладыя людзі ва ўзросце 20-25 гадоў. Частка падазроных у момант затрымання знаходзілася ў стане наркатычнага або алкагольнага ап'янення. "Ужо відавочна, што на чале так званых вулічных пратэстаў стаяць асобы з багатым крымінальным мінулым, якія ўцягваюць у проціпраўную дзейнасць людзей вельмі маладога ўзросту, што лёгка падпадаюць пад уплыў і вельмі агрэсіўна настроены", - падкрэслілі ў эфіры "Беларусь 1". Раней СК звярнуўся да грамадзян і заклікаў не паддавацца на правакацыі арганізатараў беспарадкаў.
