Важна дакладная пазіцыя работадаўцаў па асаблівай падтрымцы сямейнага чалавека на вытворчасці. Аб гэтым заявіла журналістам старшыня ГА "Беларускі саюз жанчын" Мар'яна Шчоткіна перад пасяджэннем праўлення Гомельскай абласной арганізацыі БСЖ, перадае карэспандэнт БЕЛТА.
На думку Мар'яны Шчоткінай, чалавек павінен цалкам разлічваць на разуменне і падтрымку з боку наймальніка, гэтак жа як і на стварэнне бяспечных умоў працы. "Спецыяліст заўсёды будзе працаваць якасна і адказна, калі ў яго дома ўсё добра, калі ён спакойны за сваю сям'ю і дзяцей", - падкрэсліла яна.
У сістэме работы Беларускага саюза жанчын практыкуюцца выязныя пасяджэнні праўлення. Бліжэйшае з іх пройдзе ў Мінску 23 жніўня. Па прапанове жаночай грамадскасці на сустрэчы будзе разгледжана пытанне аб падтрымцы сем'яў на прадпрыемствах. Удзельнікі вывучаць вопыт арганізацый, на якіх ствараюцца ўсе ўмовы для таго, каб бацькі маглі спакойна выконваць сямейныя абавязкі і працаваць. "Цяпер гэты напрамак называюць стварэннем рабочых месцаў, дружалюбных сем'ям. Ёсць нямала прыкладаў, калі ў арганізацыях адкрываюцца дзіцячыя пакоі, служба дапамогі і садзейнічання моладзі і сем'ям", - адзначыла Мар'яна Шчоткіна.
У Гомелі старшыня БСЖ наведала ААТ "Спартак", большая частка работнікаў якога жанчыны. Вывучыла іх умовы працы, а таксама дзейнасць пярвічнай арганізацыі. Мар'яна Шчоткіна правяла на прадпрыемстве асабісты прыём грамадзян. "Гэта неабходна, каб ведаць, як будуецца работа, якія ўмовы створаны для работнікаў, якія пытанні ёсць у людзей да парламента і ўрада, што яны могуць прапанаваць па змяненні заканадаўства, а таксама паляпшэнні ўмоў для жыцця. Для гэтага неабходна слухаць і чуць людзей, а гэта немагчыма без адкрытых і сумленных сустрэч. Заўсёды разлічваю на цікавую размову. На такіх сустрэчах паступае нямала прапаноў", - падзялілася яна.
Як расказала Мар'яна Шчоткіна, гомельская абласная арганізацыя займае адно з вядучых месцаў у рабоце Беларускага саюза жанчын. І маючыя адбыцца мерапрыемствы рэспубліканскага маштабу будуць праводзіцца пры актыўным удзеле паўднёва-ўсходняга рэгіёна краіны. У ліку актуальных задач - падтрымка жанчын, якія працуюць у сельскай мясцовасці. Цяпер ідзе ўборачная кампанія і людзі, задзейнічаныя ў ёй, заслугоўваюць асаблівай увагі. Каб узмацніць гэту падтрымку, жаночая супольнасць пры правядзенні мерапрыемстваў прапануе інтэгравацца з іншымі грамадскімі аб'яднаннямі (прафсаюзы, "Белая Русь" і інш.).
Таксама ў рэспубліцы стартавала акцыя "Збяром партфель разам". "Неабходна прыкласці максімум намаганняў, каб дзеці пайшлі ў школу падрыхтаваныя, з усім неабходным, партфелямі і формай. У абавязковым парадку неабходна наведаць сацыяльныя прытулкі, даведацца, як жывуць дзеці, ці здаровыя яны, ці ёсць у іх усё неабходнае, каб 1 верасня стала для іх сапраўдным святам", - растлумачыла Мар'яна Шчоткіна.
У БСЖ плануюць таксама развіваць акцыю "Сямейнае чытанне" і іншыя напрамкі дзейнасці. У прыярытэце - аспекты сямейнай палітыкі, падтрымка маладых бацькоў, умацаванне інстытута шлюбу.
"Самае галоўнае, што сёння наша аб'яднанне цэняць на ўсіх узроўнях, разумеюць яго значную ролю ў развіцці розных напрамкаў і вырашэнні сацыяльных праблем. Усё залежыць ад нас, ад кожнай з нас", - звярнулася Мар'яна Шчоткіна да калег з абласной арганізацыі, адзначыўшы важнасць сістэмнасці, традыцый і пераемнасці ў рабоце. У другім паўгоддзі будуць падведзены вынікі конкурсу на лепшую пярвічную арганізацыю БСЖ, таму ў членаў арганізацыі ёсць час, каб праявіць сябе.
Грамадскае аб'яднанне "Беларускі саюз жанчын" створана 14 снежня 1991 года. На добраахвотнай аснове аб'ядноўвае жаночыя саветы, створаныя ва ўсіх абласцях, раёнах, гарадах, у многіх працоўных калектывах і навучальных установах. На гэты час у БСЖ - больш за 140 тыс. жанчын, дзейнічае звыш 4 тыс. пярвічных арганізацый. У тым ліку ў Гомельскай вобласці - каля 13 тыс. чалавек і амаль 550 пярвічак.
