Указ нумар 78 "Аб мерах па павышэнні эфектыўнасці сацыяльна-эканамічнага комплексу Рэспублікі Беларусь" павінен дапамагчы зрабіць сістэму ЖКГ больш празрыстай, такое меркаванне выказаў карэспандэнту БЕЛТА аналітык групы кампаній Forex Club Валерый Палхоўскі.
Згодна з указам, Саўміну, аблвыканкамам і Мінгарвыканкаму даручана забяспечыць ў 2016 годзе зніжэнне затрат арганізацый, якія аказваюць жыллёва-камунальныя паслугі, і своечасовае прыняцце рашэнняў па дасягненні ўзроўню іх кампенсацыі тарыфамі для насельніцтва ў памеры 50 працэнтаў па ўсім комплексе паслуг. Дадатковыя даходы па сістэме Мінэнерга ад зніжэння аб'ёмаў перакрыжаванага субсідзіравання плануецца накіраваць на зніжэнне тарыфаў на энергарэсурсы для прамысловых спажыўцоў.
"Сёння грамадзянам даволі складана ацаніць адэкватнасць тарыфаў ЖКГ - няма адказу на пытанне, колькі рэальна каштуюць ЖКП. Па сутнасці, гэтыя паслугі ўспрымаюцца як адносна танныя, хоць на самай справе яны аплачваюцца за кошт перакрыжаванага субсідзіравання. Калі фарміраванне тарыфаў і работы сістэмы ЖКГ стане больш зразумелым і празрыстым, то гэта будзе пазітыўным момантам для эканомікі", - адзначыў Валерый Палхоўскі.
Ва ўказе таксама прапісана персанальная адказнасць за эфектыўную работу стратных сельгасарганізацый. "Тут таксама ёсць прастора для манеўру, паколькі не на ўсіх сельгасарганізацыях менеджмент дастаткова эфектыўны. Большасць сельгасарганізацый - дзяржаўнай формы ўласнасці, таму, па сутнасці, указам узмацняецца кантроль за іх работай", - лічыць эксперт.
"У цяперашніх умовах больш важна не вучыцца лепш эканоміць, а спрабаваць больш зарабляць. Адпаведна, трэба зніжаць сабекошт прадукцыі, даваць магчымасць развівацца бізнесу, што і адзначаецца ва ўказе. Цяпер пытанне ў тым, як гэтыя меры будуць рэалізаваны на практыцы", - рэзюмаваў Валерый Палхоўскі.
