Толькі сумеснымі намаганнямі краіны СНД могуць процістаяць усім выклікам і пагрозам, заявіў журналістам намеснік старшыні Выканаўчага камітэта - выканаўчага сакратара СНД Віктар Гумінскі, паведамляе карэспандэнт БЕЛТА.
У Выканкаме СНД у Мінску праходзіць чарговае пасяджэнне Савета пастаянных паўнамоцных прадстаўнікоў дзяржаў СНД пры статутных і іншых органах Садружнасці. У парадку дня каля 7 пытанняў. У прыватнасці, будуць разгледжаны вынікі праведзенага 6 лістапада пасяджэння Савета кіраўнікоў урадаў СНД і намечаны задачы па рэалізацыі прынятых на ім дакументаў і дасягнутых дамоўленасцей.
"Парадак дня Савета кіраўнікоў урадаў СНД быў вельмі насычаным. Разгледжаны 23 пытанні і прыняты адпаведныя рашэнні. Я хацеў бы спыніцца на тым, што кіраўнікі ўрадаў у сваіх выступленнях з вялікай трывогай і заклапочанасцю гаварылі аб тых магчымасцях, якія сёння ёсць у нашых краін, але яны не рэалізуюцца. Асабліва цяпер, ва ўмовах пандэміі, нам трэба зрабіць усё магчымае, каб з найменшымі стратамі прайсці гэты перыяд. Размова ішла аб тым, што можна зрабіць у плане медыцыны, вытворчасці вакцын, аб забеспячэнні зялёных калідораў для транспартнага перамяшчэння пры правядзенні экспартна-імпартных аперацый, асабліва медыцынскага абсталявання, лякарстваў, - сказаў Віктар Гумінскі. - Падкрэслівалася, што ва ўмовах санкцый, пратэкцыянісцкіх мер адносна нашых дзяржаў, нядобрасумленнай канкурэнцыі, мы павінны падтрымліваць адзін аднаго, каб нам лягчэй было пераадольваць тыя праблемы, якія ствараюцца ва ўмовах глабальнай рэгіянальнай нестабільнасці і канфліктаў. Размова ішла аб зялёнай эканоміцы і аб выкарыстанні пераваг, якія ёсць на прасторы СНД у транспартна-лагістычнай і энергетычнай сферах".
Акрамя таго, сёння пастаянныя прадстаўнікі абмяркуюць дзейнасць місіі наглядальнікаў ад СНД у бягучым годзе, а таксама пытанне аб рэалізацыі плана шматузроўневых кансультацый паміж міністэрствамі замежных спраў на гэты год і заслухаюць справаздачу аб дзейнасці Міждзяржаўнага савета па геадэзіі, картаграфіі, кадастры і дыстанцыйным зандзіраванні Зямлі. "Савет існуе з 1992 года. Гаварыць аб яго значнасці не трэба. Сёння члены савета заслухаюць даклады і прымуць рэкамендацыі для паляпшэння яго работы", - адзначыў намеснік старшыні Выканкама СНД.
На пасяджэнні будзе таксама ўзгоднена кандыдатура кіраўніка місіі наглядальнікаў ад Садружнасці на выбарах дэпутатаў Мажыліса парламента Казахстана, назначаных на 10 студзеня 2021 года.-0-
