Супрацоўніцтва Беларусі і Расіі ў сферы адукацыі развіваецца сістэмна і дынамічна. Аб гэтым заявіў намеснік прэм'ер-міністра Беларусі Ігар Петрышэнка падчас сустрэчы з міністрам навукі і вышэйшай адукацыі Расіі Валерыем Фальковым і першым намеснікам міністра асветы Расіі Дзмітрыем Глушко, перадае карэспандэнт БЕЛТА.
"Адносіны ў сферы адукацыі паміж нашымі краінамі развіваюцца сістэмна, дынамічна і эфектыўна. Важнейшая форма работы - гэта прамыя кантакты паміж рэгіёнамі. У кожным пагадненні з рэгіёнамі Расіі, якое падпісвае беларускі ўрад, у абавязковым парадку ёсць адукацыйны складнік. Дзейнічае шэраг міжурадавых і міжведамасных пагадненняў, праграм, якія даюць нам магчымасць развіваць супрацоўніцтва. Паміж нашымі ВНУ ёсць дагаворы прамога плана. Нашы студэнты прыязджаюць да вас, вашы - да нас", - сказаў Ігар Петрышэнка.
Паводле слоў віцэ-прэм'ера, у Беларусі і Расіі сумесныя падыходы да фарміравання адукацыйных праграм.
"Гэта важнейшы элемент, паколькі сумесная работа дапамагае нам адстойваць свае канкурэнтныя перавагі, - падкрэсліў ён. - Хачу падзякаваць вам за садзейнічанне ў развіцці супрацоўніцтва і ў сферы навукі і тэхналогій, і ў сферы фарміравання агульнай адукацыйнай прасторы".
Валерый Фалькоў звярнуў увагу на неабходнасць пашыраць узаемадзеянне паміж беларускімі і расійскімі ВНУ, рэалізоўваць сумесныя маладзёжныя праекты. Ён таксама адзначыў, што ў Беларусі створаны спрыяльныя ўмовы для работы філіялаў ВНУ РФ: Расійскага дзяржаўнага сацыяльнага ўніверсітэта і Расійскага эканамічнага ўніверсітэта імя Пляханава. "Мы іх сарыентавалі на работу ў цесным узаемадзеянні з Міністэрствам адукацыі Беларусі, паколькі падрыхтоўка кадраў павінна праводзіцца з улікам перспектыўных патрэбнасцей краіны", - дадаў ён.
Сёння ў Мінску пройдзе сумеснае пасяджэнне калегій Міністэрства адукацыі і Дзяржаўнага камітэта па навуцы і тэхналогіях Беларусі, Міністэрства навукі і вышэйшай адукацыі і Міністэрства асветы Расіі. Запланавана абмеркаванне пытанняў узаемадзеяння ў сферах адукацыі, навукі і маладзёжнай палітыкі, рэалізацыі праграм Саюзнай дзяржавы, а таксама падпісанне двухбаковых дакументаў аб супрацоўніцтве.
