Палітыка беларускай дзяржавы накіравана на чалавека, заявіў карэспандэнту БЕЛТА стыпендыят спецыяльнага фонду Прэзідэнта па сацыяльнай падтрымцы адораных навучэнцаў і студэнтаў, малады даследчык, студэнт Беларускага дзяржаўнага эканамічнага ўніверсітэта Пётр Арлоў.
"Асабіста я з'яўляюся студэнтам 3-га курса дзяржаўнай ВНУ, прычым бюджэтнай формы навучання. Акрамя таго, я стыпендыят спецфонду Прэзідэнта. На мой погляд, гэтыя рэперныя кропкі сведчаць аб сацыяльным характары і накіраванасці нашай дзяржавы на падтрымку кожнага чалавека", - сказаў Пётр Арлоў.
Паводле яго слоў, адно з важнейшых дасягненняў Беларусі - набыццё суверэнітэту, незалежнасці, пабудова дзяржавы, прызнанай на міжнароднай арэне, у якой ёсць магчымасць рэалізаваць сябе ў самых розных сферах і напрамках. "Я нарадзіўся ў гэтай краіне. Тут жывуць мае родныя і блізкія, і ў маёй краіны ёсць будучыня. Курс на падтрыманне стабільнасці і незалежнасці з'яўляецца прыярытэтным таксама і для мяне асабіста пры вызначэнні будучага сваёй краіны", - адзначыў малады чалавек.-0-
