Пацыентам варта выказваць падзяку ўрачам, адпраўляючы аб іх рабоце станоўчыя водзывы кіраўніцтву або ў Міністэрства аховы здароўя. Такі знак увагі лепшы за падарункі ў выглядзе шакаладак і каробак цукерак. Такое меркаванне журналістам выказаў дэпутат Палаты прадстаўнікоў, старшыня Беларускай асацыяцыі ўрачоў Дзмітрый Шаўцоў, перадае карэспандэнт БЕЛТА.
Дэпутат адзначыў, што кіраўніцтва бальніцы або паліклінікі, праваахоўныя органы могуць няправільна зразумець значэнне падарунка, калі ён будзе зроблены перад аказаннем дапамогі. "Калі гаварыць пра падзяку пасля лячэння, то, думаю, гэта будзе адэкватна ўспрынята. Іншая справа, што пацыент павінен разумець: калі ён хоча выказаць сваю павагу ўрачу, то не трэба гэта рабіць сам-насам у выглядзе каробкі цукерак або шакаладкі", - лічыць ён.
"Трэба зрабіць так, каб усе аб гэтым ведалі: пакінуць запіс у кнізе, напісаць зварот на імя галоўнага ўрача, у вышэйшую інстанцыю - камітэт аховы здароўя гарвыканкама або ўпраўленне аховы здароўя вобласці, у Міністэрства аховы здароўя", - растлумачыў Дзмітрый Шаўцоў.
Усе падзякі, як і нараканні, зачытваюцца на агульных планёрках. Потым па выніках работы за месяц гэта ўлічвае камісія па прэміраванні. Парламентарый перакананы, што прыемнае слова на агульнай планёрцы і прэміраванне будуць больш правільным і прыемным падарункам для ўрача ад пацыента.
