Са штодзённай работай жанчын ні адзін мужчына не справіцца, адзначыў старшыня Магілёўскага аблвыканкама Леанід Заяц у час урачыстага прыёму да Дня жанчын, перадае карэспандэнт БЕЛТА.
"Вы гадуеце і выхоўваеце дзяцей, забяспечваеце дамашнюю ўтульнасць, любіце і падтрымліваеце. Акрамя таго, вы працуеце ў сферах эканомікі, прамысловасці, у сельскай гаспадарцы, ахове здароўя, адукацыі і спорце. І дома, і на рабочых месцах вы паказваеце дастойны прыклад для іншых. Удзячны за вашу складаную і адказную працу", - павіншаваў жанчын Леанід Заяц.
На ўрачыстым прыёме ў аблвыканкаме сабраліся 30 прадстаўніц прыгожага полу. Сярод іх сем шматдзетных маці, якім сёння ўручылі ордэн Маці.
Губернатар адзначыў, што ў рэгіёне пражываюць амаль 11 тыс. шматдзетных сем'яў, і кожны год іх становіцца больш. "Гэта прыемная тэндэнцыя. У нашай краіне існуюць розныя варыянты падтрымкі і дапамогі такім сем'ям. І ў Магілёўскай вобласці ствараюцца ўсе ўмовы, каб жанчыны, дзеці і іх родныя адчувалі сябе камфортна", - падкрэсліў ён.
Для мамы пяцярых дзяцей Алены Кісель з Кіраўскага раёна самае важнае ў жыцці - дзеці. "Гэта такое шчасце: назіраць і дапамагаць ім расці, радавацца перамогам і падтрымліваць пры няўдачах. Але без падтрымкі мужа і сваякоў з вялікай сям'ёй не справіцца, - заўважыла яна. - Таму ў гэты дзень я хачу пажадаць усім жанчынам зведаць шчасце мацярынства. Пачуць першае слова свайго дзіцяці, убачыць яго першыя крокі. Быць любімымі і шчаслівымі. Паколькі калі мама ў форме - дом заўсёды будзе напоўнены любоўю і шчасцем".
