Парад у Дзень Перамогі - наша гісторыя, традыцыі і сувязны мост паміж пакаленнямі. Такое меркаванне карэспандэнту БЕЛТА выказаў першы сакратар Цэнтральнага камітэта Беларускага рэспубліканскага саюза моладзі, член Савета Рэспублікі Нацыянальнага сходу Дзмітрый Варанюк.
"Беларуская моладзь у першых радах выступае за пераемнасць. Мы - праўнукі пераможцаў, нашчадкі воінаў-вызваліцеляў і на нашых плячах ляжыць адказнасць за захаванне гістарычнай памяці аб вайне і яе героях. А той, хто адмаўляецца ад гісторыі, - у таго няма будучыні. Парад - гэта жывое сведчанне мужнасці і гераізму нашага народа. І пэўнае пасланне аб тым, што Беларусь памятае кожнага, шануе гэту памяць і не здраджвае сваім традыцыям, - сказаў Дзмітрый Варанюк. - Хто хоча прыйсці на парад - няхай прыходзіць, хто хоча застацца дома - няхай застаецца дома. Ніхто нікога не прымушае. А для людзей, якія прыйдуць у Дзень Перамогі на святочныя мерапрыемствы, будуць забяспечаны ўсе неабходныя прафілактычныя меры".
Першы сакратар ЦК БРСМ падкрэсліў, што ў гэтыя дні без увагі моладзі не застанецца ні адзін ветэран. "Вядома, нашы ветэраны змогуць паглядзець парад па тэлевізары, мы абавязкова іх паберажом, але не пакінем без увагі і абавязкова павіншуем, - адзначыў ён. - Многія праекты БРСМ рэалізуе ў інтэрнэце. Напярэдадні 9 Мая стартуе вялікі On Air марафон "Беларусь памятае. Кветкі Вялікай Перамогі", дзе мы ў прамых эфірах будзем гаварыць аб пакаленні пераможцаў, дзякаваць ветэранам, якія падарылі нам 75 мірных гадоў. У час марафону будзем размаўляць з прадстаўнікамі спорту і творчымі людзьмі. Яны падзеляцца гісторыямі сваіх сем'яў і раскажуць аб тым, як нашчадкі пераможцаў ушаноўваюць памяць аб героях Вялікай Айчыннай вайны".
