Новыя падыходы да налічэння пенсій за асаблівыя ўмовы працы забяспечваюць справядлівасць. Такое меркаванне выказаў старшыня Федэрацыі прафсаюзаў Беларусі Міхаіл Орда ў гутарцы з карэспандэнтам БЕЛТА.
Людзі, якія шмат гадоў адпрацавалі ў асаблівых умовах працы, безумоўна, заслугоўваюць справядлівага падыходу ў пытанні налічэння прафесійнай пенсіі, лічыць Міхаіл Орда. Работа трактарыста, механізатара, даяркі, вадзіцеля грамадскага транспарту - не самая простая. Калісьці, пачынаючы працаваць па гэтых спецыяльнасцях, людзі ведалі, што праз 15-20 гадоў яны змогуць разлічваць на датэрміновую пенсію пэўнага ўзроўню. Сітуацыю змянілі падыходы, уведзеныя ў 2009 годзе.
Як растлумачыў лідар нацыянальнага прафцэнтра, да 2009 года датэрміновая пенсія выплачвалася з агульнай пенсійнай сістэмы краіны. Пры гэтым людзі маглі прадаўжаць працаваць на сваіх рабочых месцах. Пасля ўвядзення прафесійнага пенсійнага страхавання сродкі для выплаты пенсій за асаблівыя ўмовы працы сталі накоплівацца на рахунку кожнага работніка. Акрамя таго, пры выхадзе на прафесійную пенсію чалавек павінен быў пакінуць сваё ранейшае рабочае месца.
Як і пры любым іншым увядзенні новых правіл, быў устаноўлены пераходны перыяд. Тыя, хто адпрацаваў пасля 1 студзеня 2009 года менш за 10 гадоў і пры гэтым мае неабходны стаж, атрымліваюць датэрміновую пенсію па ранейшых правілах. А тыя, хто пасля 2009 года працаваў на асаблівых умовах звыш 10 гадоў, мог разлічваць толькі на пенсію, разлічаную па новых правілах (пры наяўнасці неабходнага стажу). Пры гэтым з-за невялікага перыяду і сум адлічэнняў накопленая пенсія ў такіх людзей складае ўсяго толькі Br50-70.
"У мінулым годзе да нас пайшоў вал зваротаў наконт гэтага. Людзі разумелі: каб захаваць за сабой права на выхад на пенсію па ранейшых правілах, ім неабходна пакінуць сваё месца работы. Гэта вопытныя, кваліфікаваныя работнікі. Яны зацікаўлены ў тым, каб працаваць далей. Наймальнікі таксама зацікаўлены ў тым, каб захаваць кадравы склад. На некаторых прадпрыемствах даходзіла да таго, што звольніцца магла адразу трэць спецыялістаў, - адзначыў Міхаіл Орда. - Таму ў мінулым годзе мы звярнуліся да кіраўніка дзяржавы з ініцыятывай захаваць за работнікамі, якія шмат гадоў адпрацавалі ў асаблівых умовах працы, ранейшыя правілы выхаду на датэрміновую пенсію. Мінпрацы распрацавала адпаведны праект нарматыўнага прававога акта, які быў зацверджаны Прэзідэнтам. Безумоўна, гэта справядліва і сумленна ў адносінах да людзей".
Як паведамлялася, кіраўнік дзяржавы падпісаў указ нумар 15 "Аб змяненні ўказаў Прэзідэнта Рэспублікі Беларусь", які рэгулюе пытанні датэрміновага пенсійнага забеспячэння грамадзян, занятых на работах з асаблівымі ўмовамі працы і асобнымі відамі прафесійнай дзейнасці. Тым, хто выпрацаваў на 1 студзеня 2009 года не менш як палавіну неабходнага льготнага стажу ў асаблівых умовах працы, прадастаўляецца права на назначэнне датэрміновай ільготнай пенсіі згодна з законам "Аб пенсійным забеспячэнні "ўзамен датэрміновай прафесійнай пенсіі згодна з законам "Аб прафесійным пенсійным страхаванні".
