Нашу агульную Перамогу ў нас ніхто ніколі не адніме, заявіў журналістам начальнік упраўлення Генеральнай пракуратуры, кіраўнік следчай групы па расследаванні крымінальнай справы аб генацыдзе беларускага народа Валерый Талкачоў, перадае карэспандэнт БЕЛТА.
Сёння каля сімвала Перамогі - легендарнага танка Т-34 у Мінску БРСМ даў старт рэспубліканскай патрыятычнай эстафеце памяці "Беларусь памятае. Памятаем кожнага". Актыў і лідары маладзёжнай арганізацыі, піянеры, грамадскасць усклалі кветкі да помніка воінам-вызваліцелям Мінска, запалілі лампады ў памяць аб загінулых у гады Вялікай Айчыннай вайны савецкіх воінах.
"Мы ганарымся Перамогай нашага народа ў Вялікай Айчыннай вайне. Вельмі радуе, што сёння тут, каля гэтага гістарычнага месца - помніка воінам-вызваліцелям Мінска, танка Т-34, прысутнічае наша падрастаючае маладое пакаленне, і што ў цэлым моладзь прымае вельмі актыўны ўдзел у памятных мерапрыемствах, якія пад эгідай БРСМ праходзяць па ўсёй рэспубліцы. У рамках расследавання крымінальнай справы аб генацыдзе беларускага народа праводзіцца поўнамаштабная работа. Мы пачалі чарговую актыўную фазу раскопак месцаў масавых забойстваў і пахаванняў нашага мірнага насельніцтва. У бягучым годзе мы плануем правесці 27 такіх пошукавых работ. Месцы гэтыя ёсць. Яны ўстаноўлены намі. Работа ў гэтым напрамку прадаўжаецца", - расказаў Валерый Талкачоў.
Паводле яго слоў, палітычныя эліты заходніх дзяржаў праводзяць адкрытую, па сутнасці, легалізаваную русафобію. "Мы бачым, як актыўна ідзе рэабілітацыя нацызму. У Еўропе зносяць помнікі, заклікаюць не святкаваць Дзень Перамогі, - адзначыў начальнік упраўлення. - У нас у Рэспубліцы Беларусь гэта не пройдзе. Мы будзем ставіць бар'еры гэтым напрамкам. Вялікая Перамога - гэта наша агульная Перамога, яе ў нас ніхто ніколі не адніме і не ўкрадзе. Гэта подзвіг нашага савецкага народа. Беларусь у вайну пацярпела вельмі моцна. І наша пакаленне не павінна аб гэтым забываць. Мы абавязаны памятаць, абавязаны расказваць праўду, што мы пастаянна і робім. Сёння вельмі важна нам усім быць разам, як тады, у саракавыя".
У Год гістарычнай памяці і 77-ю гадавіну Вялікай Перамогі мерапрыемствы эстафеты пройдуць ва ўсіх кутках Беларусі з 4 мая па 3 ліпеня. Жыхары краіны са сваімі сем'ямі ўскладуць кветкі да мемарыяльных комплексаў, абеліскаў, помнікаў і брацкіх магіл. Лейтматыў эстафеты - сказаць дзякуй прадзедам і дзядам за 77 гадоў мірнага неба над нашай краінай, за тое, што мы, беларусы, можам працаваць, вучыцца, гадаваць дзяцей, радавацца жыццю, спяваць, танцаваць і сябраваць.
Сёння важным элементам старту патрыятычнага праекта "Беларусь памятае. Памятаем кожнага" стаў дыялог пакаленняў "Кветкі Вялікай Перамогі" ў Рэспубліканскім доме моладзі. Актуальная дыскусія прайшла ў фармаце афлайн і анлайн з удзелам моладзі з усіх рэгіёнаў Беларусі, у тым ліку прадстаўнікоў піянерскай арганізацыі, ветэранаў Вялікай Айчыннай вайны, прадстаўнікоў Генеральнай пракуратуры, дэпутацкага корпуса, Дзяржаўнага мемарыяльнага комплексу "Хатынь".
У цэнтры ўвагі ўдзельнікаў дыялогу былі тэмы генацыду беларускага народа, кансалідацыі беларускага грамадства на аснове гераічных традыцый і гісторыі краіны, захавання сувязнай ніці пакаленняў, процістаяння спробам скажэння гістарычнай праўды аб гераізме і ролі савецкага народа ў гісторыі Другой сусветнай вайны. Мадэратарам дыскусіі выступіў першы сакратар ЦК БРСМ Аляксандр Лук'янаў.
Перад пачаткам дыялогу БРСМ прэзентаваў абноўленую версію віртуальнага альбома "Беларусь памятае". Маладзёжную ініцыятыву аб стварэнні нацыянальнага альбома памяці "Беларусь памятае" 9 мая 2019 года на плошчы Перамогі ў Мінску падтрымаў Прэзідэнт Беларусі Аляксандр Лукашэнка.
Эстафета памяці "Беларусь памятае. Памятаем кожнага", дыялог пакаленняў "Кветкі Вялікай Перамогі", Нацыянальны альбом "Беларусь памятае" ўжо даўно сталі састаўной часткай шматступеньчатага рэспубліканскага патрыятычнага праекта "Кветкі Вялікай Перамогі", сімвалам якога з'яўляецца яблыневы цвет і чырвона-зялёная стужачка - знак павагі і ўдзячнасці за мір і незалежнасць нашай краіны.
Штогод аб'ядноўваючы па ўсёй краіне сотні тысяч людзей, патрыятычная ініцыятыва, прапанаваная БРСМ у Год моладзі і 70-ю гадавіну Перамогі, перарасла ў нацыянальны праект "Кветкі Вялікай Перамогі" і стала сімвалам пераемнасці пакалення пераможцаў і маладых сучаснікаў.
