Мясцовыя Саветы адыгрываюць вялікую ролю ў развіцці рэгіёнаў і краіны ў цэлым. Такое меркаванне выказаў карэспандэнту БЕЛТА намеснік старшыні Пастаяннай камісіі па ахове здароўя, фізічнай культуры, сямейнай і маладзёжнай палітыцы Палаты прадстаўнікоў Вадзім Дзевятоўскі.
"Я два разы выбіраўся ў мясцовыя Саветы дэпутатаў і ведаю, што гэта такое. Сёння сказаць, што кожны голас важны, гэта нічога не сказаць, - мы выбіраем будучыню нашай краіны", - перакананы парламентарый.
Паводле яго слоў, значнасць дэпутата мясцовых Саветаў цяжка пераацаніць. Ён надзяляецца паўнамоцтвамі, якія могуць дапамагчы змяніць многае ў жыцці той ці іншай тэрыторыі. Галоўнае, каб дэпутатам стаў дастойны, ініцыятыўны і актыўны чалавек, здольны займацца грамадскай работай і адстойваць правы грамадзян. Бо людзі будуць чакаць ад яго не слоў і абяцанняў, а канкрэтных спраў. Напрыклад, вырашэння пытанняў, звязаных з рамонтам дарогі або добраўпарадкаваннем тэрыторыі, вырашэння праблемы занятасці і г. д. "Таму ад выбару кожнага з нас сёння залежыць вельмі многае", - заўважыў Вадзім Дзевятоўскі.
Грамадзяне павінны зрабіць усвядомлены выбар і дэлегаваць у мясцовыя Саветы чалавека, які можа і будзе вырашаць іх надзённыя праблемы, падкрэсліў парламентарый. І задача дэпутата любога ўзроўню - чуць людзей, адстойваць іх інтарэсы і правы. Важна, каб гэта быў чалавек ініцыятыўны і працаваў на развіццё той ці іншай тэрыторыі. "Таму ад таго, каго мы сёння выберам, будзе залежаць не толькі будучыня вёскі, раёна або горада, але і ў цэлым развіццё краіны", - лічыць Вадзім Дзевятоўскі.
