Усё жыццё і творчасць Максіма Багдановіча ўяўляе сабой прыклад адносін да Айчыны і роднай мовы. Такое меркаванне выказаў журналістам пасля цырымоніі закладкі капсулы з зямлёй з магілы паэта міністр культуры Барыс Святлоў, перадае карэспандэнт БЕЛТА.
Паводле слоў міністра, Максім Багдановіч - гэта не проста сімвал, а аснова сучаснай беларускай культуры. Ён даў напрамак для развіцця літаратуры і паказаў, як трэба адносіцца да Айчыны, роднай мовы, сказаў Барыс Святлоў.
Цырымонія "Вяртанне" па закладцы капсулы з зямлёй з магілы паэта ў Ялце адбылася ў крыпце Храма-помніка ў гонар Усіх святых.
Як адзначыў, звяртаючыся да гасцей, настаяцель Усіхсвяцкага прыхода Мінска протаіерэй Фёдар Поўны, Максім Багдановіч хацеў завяршыць на роднай зямлі свой жыццёвы шлях, але лёс склаўся інакш, аднак заўсёды былі людзі, якія захоўвалі памяць пра беларускага паэта. Пахаванне капсулы з зямлёй у храме ў Мінску - выкананне яго волі і магчымасць маліцца аб душы паэта, сказаў ён.
Пасля цырымоніі ў Белай зале храма адбылося мемарыяльнае літаратурнае чытанне, дзе гучалі вершы Максіма Багдановіча. Мерапрыемствы з нагоды 125-годдзя з дня нараджэння Максіма Багдановіча праходзяць таксама ў розных рэгіёнах Беларусі.
