Правядзенне 31-га міжнароднага кангрэса Асацыяцыі ўдзельнікаў касмічных палётаў у Мінску адкрые новыя магчымасці для ўдзелу Беларусі ў міжнародных праектах. Такое меркаванне выказаў 4 верасня журналістам намеснік старшыні Прэзідыума Нацыянальнай акадэміі навук Беларусі Сяргей Кілін, перадае карэспандэнт БЕЛТА.
"Спадзяёмся, што ўдзел вялікай колькасці касманаўтаў, прадстаўнікоў еўрапейскіх касмічных агенцтваў і NASA ў кангрэсе дасць магчымасць нам больш якасна ўключыцца ў міжнародную касмічную дзейнасць. У нас ёсць усе падставы для гэтага ў выглядзе навуковых дасягненняў, якія актыўна выкарыстоўваюцца. У беларускіх арганізацый, вядома ж, ёсць жаданне ўдзельнічаць у новых міжнародных касмічных праектах. Яны цяпер рэалізуюцца па некалькіх напрамках. Першы - выкарыстанне касмічных магчымасцей для зямных мэт, інакш кажучы дыстанцыйнае зандзіраванне Зямлі для сельскай гаспадаркі, кадастраў, прагназавання прыродных катаклізмаў і іншых мэт. Другі - накіраванне ў далёкі космас. Цяпер ёсць два вялікія праекты - вяртанне на Месяц і выкарыстанне яго як стартавай пляцоўкі для асваення далёкага космасу, а таксама палёты на Марс. Трэба вырашыць мноства вельмі складаных тэхнічных праблем, перш за ўсё звязаных з тым, як уздзейнічаюць на чалавека радыяцыя і адсутнасць гравітацыі пры працяглым знаходжанні ў космасе. У нас на кангрэсе будуць Скот Келі і Міхаіл Карніенка, якія спецыяльна знаходзіліся на арбіце на працягу года, вывучаючы магчымасці чалавечага арганізма", - сказаў Сяргей Кілін.
У Расіі праводзіцца шэраг эксперыментаў ва ўмовах працяглай ізаляцыі, якая мадэлюе абстаноўку на касмічным караблі. "Беларускаму боку прапанавалі паўдзельнічаць у гэтым праекце, які называецца SIRIUS. Яго рэалізуе Інстытут медыка-біялагічных праблем Расійскай акадэміі навук. Гэта сумесны праект з NASA. У ім можна ўдзельнічаць двума спосабамі: першы з іх - распрацоўка і прадстаўленне сваіх навуковых эксперыментаў для рэалізацыі, другі - удзел канкрэтнага чалавека ў гэтай праграме, у эксперыментах, - адзначыў намеснік старшыні Прэзідыума НАН. - Ёсць таксама шэраг іншых прапаноў з боку "Раскосмаса" па пашырэнні нашай сумеснай дзейнасці".
Беларусь у мінулым годзе ў Тулузе (Францыя) выступіла з прапановай правесці міжнародны касмічны кангрэс-2018 у Мінску, і члены Выканкама Асацыяцыі ўдзельнікаў касмічных палётаў адобрылі гэту ініцыятыву. "Крытэрыі выбару краіны для правядзення кангрэса даволі адназначныя. Яна павінна быць значнай і прыкметнай у міжнароднай супольнасці па сваёй касмічнай дзейнасці. Павінны быць рэальныя дасягненні ў гэтай сферы і ўдзельнікі касмічных палётаў з гэтай краіны, - сказаў Сяргей Кілін. - Беларусь можна назваць значнай на міжнароднай арэне ў касмічнай сферы ў трох кампанентах. Па-першае, не так шмат краін, якія ўдзельнічалі ў рэалізацыі касмічнай праграмы з самага пачатку. Па-другое, ураджэнцы Беларусі Пётр Клімук, Уладзімір Кавалёнак, Алег Навіцкі - гэта касманаўты, вядомыя ва ўсім свеце людзі, да якіх прыслухоўваюцца. І, па-трэцяе, у нас ёсць касмічныя апараты, касмічная галіна, прадпрыемствы, вучоныя, якія здольны стварыць новую касмічную тэхніку".
Міжнародны кангрэс Асацыяцыі ўдзельнікаў касмічных палётаў пройдзе ў Мінску 9-15 верасня. У ім прымуць удзел каля 90 касманаўтаў з 17 краін. У панядзелак, 10 верасня, пройдзе цырымонія адкрыцця кангрэса ў НВЦ "Белэкспа". У сераду, 12 верасня, касманаўты сустрэнуцца з беларускімі школьнікамі і студэнтамі. Запланаваны тэхнічныя сесіі, прысвечаныя агляду міжнароднай касмічнай праграмы, абмеркаванню вынікаў палётаў на МКС, касмічнай навуцы. Акрамя таго, у час кангрэса адбудзецца адкрыццё Алеі касманаўтаў у Батанічным садзе і манумента на вул. Касманаўтаў, прысвечанага беларускім удзельнікам касмічных палётаў. Таксама для гасцей будуць арганізаваны экскурсіі па знакавых мясцінах Беларусі і культурная праграма.
Асацыяцыя ўдзельнікаў касмічных палётаў - міжнародная некамерцыйная арганізацыя, якая аб'ядноўвае касманаўтаў з многіх краін, створаная ў 1985 годзе для абмену вопытам у галіне пілатуемых касмічных палётаў. Міжнародны кангрэс АУКП штогод збірае касманаўтаў, а таксама прадстаўнікоў навукова-даследчых устаноў і нацыянальных касмічных агенцтваў.
