Канкурэнтаздольнасць сферы адукацыі магчыма толькі ў рэжыме бесперапыннага развіцця і росту прафесіяналізму як на педагагічным, так і на кіраўніцкім узроўнях. Аб гэтым заявіў старшыня Гомельскага гарвыканкама Пётр Кірычэнка на гарадскім жнівеньскім педсавеце, перадае карэспандэнт БЕЛТА.
Сёння на педагагічным форуме, які сабраў больш за паўтысячы чалавек, абазначылі траекторыю развіцця адукацыйнай сістэмы абласнога цэнтра на новы навучальны год. Пётр Кірычэнка падкрэсліў важнасць наватарства ў адукацыйным працэсе. Сучасны настаўнік павінен пастаянна асвойваць і ўкараняць у работу новыя тэхналогіі.
Разам з тым, на думку мэра, сістэма адукацыі Гомеля здольна вырашаць складаныя шматпланавыя задачы. Гэта даказвае вопыт апошніх гадоў. "Сёння па праву мы можам ганарыцца дасягнутымі ў гэтай сферы вынікамі. У мінулым годзе гомельскія вучні не раз станавіліся пераможцамі і прызёрамі рэспубліканскіх і міжнародных спаборніцтваў. За 2018 год атрымана восем медалёў за ўдзел у міжнародных конкурсах, а за мінулы перыяд 2019-га - яшчэ пяць залатых медалёў. Такія перамогі праслаўляюць і родную краіну, і родны Гомель далёка за іх межамі", - адзначыў ён.
Паводле слоў Пятра Кірычэнкі, пастаўленая ў мінулым годзе задача аб падрыхтоўцы дзяцей да рэспубліканскай алімпіяды па вучэбных прадметах выканана на выдатна. 52 прадстаўнікі Гомеля ўдастоены дыпломаў, і гэта лепшы вынік гомельскіх школьнікаў за ўсю гісторыю алімпіяднага руху. Таксама стыпендыятамі спецыяльнай прэміі Прэзідэнта Беларусі па падтрымцы таленавітай моладзі ў мінулым годзе сталі 78 навучэнцаў устаноў адукацыі Гомеля, а з пачатку 2019-га - 70. Вынікі цэнтралізаванага тэсціравання 2019 года далі Гомелю магчымасць падняцца ў абласным рэйтынгу з пятай на трэцюю пазіцыю.
Мэр абазначыў неабходнасць і ў далейшым павышаць узровень выкладання і ўдасканальваць методыкі. "Трэба быць яшчэ больш хуткімі ў пошуках новых эфектыўных форм навучання і раскрыцця патэнцыялу дзяцей", - дадаў ён. Як прыклад, прывёў сістэму работы гімназіі нумар 51 Гомеля, якую, на яго думку, можна па праву назваць аўтарскай. Яе эфектыўнасць штогод даказваюць вучні на алімпіядах і конкурсах самага высокага ўзроўню.
Асноўны жа курс у маючым адбыцца навучальным годзе застаецца нязменным - гэта якасць адукацыі. "Формула для дасягнення высокага выніку добра вядома: якасць створаных умоў, якасць адукацыйнага працэсу, якасць кіравання ва ўстановах адукацыі і як вынік - якасны рэзультат", - акцэнтаваў увагу Пётр Кірычэнка.
Нацэліўшы на плённую працу, Пётр Кірычэнка падзякаваў кіраўнікам аддзелаў і ўстаноў адукацыі, педагогам за штодзённую работу. "Упэўнены, што энтузіязм настаўнікаў, іх бязмежная адданасць прафесіі знойдуць водгук у сэрцах дзяцей, паслужаць дастойным прыкладам для падрастаючага пакалення", - сказаў ён.
У новым навучальным годзе за парты гомельскіх школ і гімназій сядуць больш за 51 тыс. дзяцей, таксама амаль 24,3 тыс. дашкалят будуць пашыраць свае жыццёвыя гарызонты ў дзіцячых садах.
