Галоўнымі ігракамі на беларускім рынку піяру павінны быць айчынныя кампаніі. Такое меркаванне выказаў карэспандэнту БЕЛТА першы намеснік міністра інфармацыі Павел Лёгкі. Ён прыняў удзел у канферэнц-сесіі "Аўтастопам па камунікацыях, або Як не заблудзіць на рынках, у аўдыторыях і трэндах", якая прайшла на палях XXIII Міжнароднай спецыялізаванай выстаўкі "СМІ ў Беларусі".
Сёння на форуме праходзіць тэматычны Дзень піяру. "Для нас як для галіновага міністэрства вельмі важна, каб развіваўся гэты напрамак нашага жыцця, эканомікі, таму што піяр не проста папулярызацыя нейкіх ідэй, фарміраванне іміджу, умацаванне рэпутацыі - гэта яшчэ і бізнес. Мы хочам, каб галоўнымі ігракамі на рынку піяру былі беларускія кампаніі. Такая мэта перад намі стаіць", - сказаў Павел Лёгкі.
Павел Лёгкі падкрэсліў, што піяр ідзе поплеч з галіной масавых камунікацый. "Таму трэба выбудоўваць канструктыўнае ўзаемадзеянне, пашыраць яго. Безумоўна, у піяршчыкаў добрыя ўзаемаадносіны з журналістамі, у журналістаў - з піяршчыкамі. Эфект ад іх узаемнага супрацоўніцтва можа быць вышэйшы сінергетычна, і ў першую чаргу з пункту гледжання развіцця дзяржаўна-прыватнага партнёрства ў гэтым сектары", - расказаў ён.
Ён акцэнтаваў увагу, што сёння ва ўсіх дзяржорганаў ёсць прэс-сакратары і спецыялісты па сувязях з грамадскасцю. "Усе разумеюць, што трэба працаваць з грамадскасцю, але цяпер трэба, каб усё гэта было рэалізавана максімальна эфектыўна. Для гэтага ў тым ліку трэба рыхтаваць спецыялістаў. І вельмі важна, каб беларускі піяр як частка бізнесу і дзяржаўныя піяршчыкі ў асобе кіраўнікоў прэс-службаў, прэс-сакратары не існавалі ў паралельных сусветах, а каб яны ўзаемадзейнічалі, узбагачалі адзін аднаго нейкімі ведамі, адпрацоўвалі нейкія праекты сумесна, і гэта толькі пойдзе на карысць", - адзначыў першы намеснік міністра.
Паводле слоў першага намесніка міністра, яшчэ адна мэта дня піяру - уключыць у працэсы камунікацыйных сувязей з грамадскасцю рэгіянальную прэсу. "Бо эфектыўны піяр у асноўным сканцэнтраваны ў сталіцы. Наша задача была, каб рэгіянальныя СМІ, якія прыехалі сюды, тут перазнаёміліся, завялі кантакты, пачалі ўзаемадзейнічаць і працаваць разам. І потым, многія прафесійныя журналісты становяцца піяршчыкамі, а піяршчыкі спрабуюць сябе ў журналістыцы. Гэта вельмі добра", - дадаў Павел Лёгкі.
Выстаўка "СМІ ў Беларусі" будзе працаваць па 4 мая ў адміністрацыйным комплексе па праспекце Пераможцаў, 14. Яна аб'яднала больш за 50 экспанентаў, якія прадстаўляюць сродкі масавай інфармацыі Беларусі, Расіі, Украіны, краін Балтыі, Узбекістана і КНР. Экспазіцыя адлюстроўвае ўвесь спектр інфармацыйнай прасторы краіны. У ёй удзельнічаюць друкаваныя і аўдыявізуальныя рэспубліканскія і рэгіянальныя СМІ, інтэрнэт-рэсурсы, інфармацыйныя агенцтвы, аператары і дыстрыб'ютары кабельнага тэлебачання, распаўсюджвальнікі друкаванай прадукцыі, выдавецтвы. Цэнтральныя тэмы выстаўкі - 75-годдзе вызвалення Беларусі ад нямецка-фашысцкіх захопнікаў, II Еўрапейскія гульні, сучасныя інтэрнэт-тэхналогіі, адраджэнне малой радзімы. Сёння на пляцоўцы "Дыпсэрвіс Хол" (зав. Вайсковы, 4) будуць уручаны ўзнагароды пераможцам у 23 намінацыях Нацыянальнага конкурсу друкаваных СМІ "Залатая літара" - у бягучым годзе на ўдзел у ім паступіла больш за 330 заявак. 4 мая на "СМІ ў Беларусі" - дзіцячы дзень. У гэты дзень юныя фотааматары змогуць атрымаць майстар-клас ад фотакарэспандэнта агенцтва Аксаны Манчук.
Міжнародная спецыялізаваная выстаўка "СМІ ў Беларусі" праводзіцца штогод з 1997 года Міністэрствам інфармацыі пры падтрымцы Міністэрства замежных спраў, Мінскага гарвыканкама, РУП "Нацыянальны выставачны цэнтр "Белэкспа", іншых органаў дзяржкіравання, вядучых СМІ, грамадскіх арганізацый.
