У Беларусі прадоўжаць курс на ўмацаванне і развіццё сямейнай палітыкі. Такое меркаванне карэспандэнту БЕЛТА выказала намеснік старшыні ГА "Беларускі саюз жанчын" Лілія Ананіч.
"Я ўпэўнена, што сацыяльны курс нашай дзяржавы на ўмацаванне сямейнай палітыкі будзе развівацца", - сказала Лілія Ананіч. Яна прывяла ў якасці прыкладу лозунг "Умацоўваючы сям'ю - умацоўваем краіну". Прычым умацаванне сямейнай палітыкі, на яе думку, адбываецца ў Беларусі дзякуючы захаванню традыцый і духоўна-маральных каштоўнасцей.
"Мы павінны прапагандаваць жаночы рух і ўсяляк падтрымліваць маці, асаблівую ўвагу ўдзяляць шматдзетным. Краіне патрэбна больш дзяцей. Для гэтага парламентарыі развіваюць сацыяльнае заканадаўства", - адзначыла намеснік старшыні грамадскага аб'яднання.
Старшыня ГА "Беларускі саюз жанчын" Мар'яна Шчоткіна звярнула ўвагу на той факт, што сацыяльная палітыка дзяржавы дае магчымасць стварыць больш спрыяльныя ўмовы для нараджэння і выхавання дзяцей, чым у некаторых іншых краінах. "Напрыклад, у Францыі працягласць водпуску па доглядзе дзіцяці да трох гадоў прадастаўляецца толькі пры нараджэнні другога і наступных, пры нараджэнні першага дзіцяці прадастаўляецца толькі адзін год без аплаты. У Балгарыі такі водпуск даецца да дасягнення дзіцем двух гадоў, у Германіі - 10 месяцаў, у Італіі - 6 месяцаў", - сказала яна. Таксама кіраўнік БСЖ лічыць, што ў Беларусі прымаюцца значныя меры для матэрыяльнай падтрымкі бацькоўства. "Больш за 8 працэнтаў ВУП ідзе ў цэлым на меры па падтрымцы сем'яў з дзецьмі, з іх не менш за 1,8 працэнта ВУП - на грашовыя дапамогі", - сказала яна.
