Дыстанцыйная адукацыя не з'яўляецца альтэрнатывай класна-ўрочнай сістэме. Такое меркаванне выказаў журналістам міністр адукацыі Ігар Карпенка, перадае карэспандэнт БЕЛТА.
"Сёння яшчэ шмат ідзе спрэчак і размоў на прадмет дыстанцыйнай адукацыі. Некаторыя бачаць у гэтым нейкую панацэю, ледзь ці не альтэрнатыву класна-ўрочнай сістэме, якая склалася ў сістэме агульнай сярэдняй адукацыі. Як прафесіянал з псіхолага-педагагічнай падрыхтоўкай магу сказаць, што дыстанцыйная падрыхтоўка не заменіць класна-ўрочную сістэму. Таму што апошняя вырашае не толькі пытанні перадачы інфармацыі або замацавання матэрыялу, але і пытанні сацыялізацыі дзяцей. Гэта ўзаемадзеянне ў сваім узроставым калектыве, у рознаўзроставых калектывах, гэта нейкія сумесныя мерапрыемствы - тое, што дазваляе дзіцяці атрымліваць сацыяльны вопыт, без якога яму цяжка выйсці ў самастойнае жыццё. У выніку дзіця атрымлівае атэстат сталасці, і не выпадкова ён менавіта так называецца", - сказаў Ігар Карпенка.
Паводле слоў міністра, педагогі дапамогуць вучням нагнаць упушчаны матэрыял. "Для нас гэта тэма не новая. І раней, калі дзіця хварэла, яно нейкія рэчы наганяла самастойна, астатняе ў школе. Але не забывайце, што ў нас ёсць шосты школьны дзень, у які настаўнікі-прадметнікі праводзяць кансультацыі", - адзначыў ён.
Ігар Карпенка нагадаў, што шмат гадоў існуе форма навучання дома. "Таму нічога тут звышнатуральнага няма. З пункту гледжання псіхолага-педагагічных методык усе гэтыя пытанні ўжо адпрацаваны", - дадаў ён.
