Дэпутаты павінны актыўней удзельнічаць у вырашэнні пытанняў занятасці, стварэнні новых высокааплатных працоўных месцаў. Такое меркаванне выказаў старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Рачкоў на сустрэчы з дэпутатамі Жодзінскага гарадскога і Мінскага абласнога Савета дэпутатаў ад Жодзіна. Аб гэтым БЕЛТА паведамілі ў прэс-службе верхняй палаты беларускага парламента.
У час сустрэчы Сяргей Рачкоў праінфармаваў аб дзейнасці Савета Рэспублікі і законах, адобраных на вясенняй сесіі. “Дэпутаты павінны актыўней удзельнічаць у вырашэнні пытанняў занятасці насельніцтва, стварэнні новых высокааплатных працоўных месцаў і забеспячэнні росту эканомікі краіны ў цэлым. Беларуская мадэль эканамічнага развіцця адпавядае інтарэсам як дзяржавы, так і простага чалавека, забяспечвае паступальнае павышэнне ўзроўню жыцця людзей”, - сказаў ён.
Сенатар дадаў, што дэпутатам неабходна прымаць рашэнні, якія садзейнічалі б разняволенню дзелавой ініцыятывы ў рэгіёнах, уключэнню патэнцыялу малых і сярэдніх прадпрыемстваў у нарошчванне экспарту і павелічэнне валютных паступленняў у краіну.
Парламентарый таксама сустрэўся з працоўнымі калектывамі ААТ “Світанак”, дзе азнаёміўся з вытворчасцю. Асаблівую ўвагу Сяргей Рачкоў удзяліў шыццю школьнай формы. Сенатар падкрэсліў, што дэпутаты павінны трымаць на кантролі падрыхтоўку дзяцей да новага навучальнага года.
Цяпер на “Світанку” ўзмоцнены акцэнт на шыцці школьнай формы і адзення для спорту. Падрыхтаваны тры капсульныя калекцыі. Акрамя таго, адшываецца тэрмабялізна, джэмперы, камізэлькі і іншы сезонны асартымент.
