Асноўнай тэмай Паслання Прэзідэнта беларускаму народу і Нацыянальнаму сходу стане ўмацаванне суверэнітэту Беларусі. Такое меркаванне журналістам выказаў старшыня Пастаяннай камісіі па адукацыі, культуры і навуцы Палаты прадстаўнікоў Ігар Марзалюк, перадае карэспандэнт БЕЛТА.
Ігар Марзалюк лічыць, што самай важнай тэмай Паслання будзе ўмацаванне суверэнітэту і нацыянальнай незалежнасці. "На гэтых выбарах вырашаецца, як гэта пафасна ні гучыць, ці будзе Беларусь незалежнай, суверэннай, самадастатковай краінай, - адзначыў парламентарый. - Гэтыя выбары праходзяць пад беспрэцэдэнтным знешнім прэсінгам".
"Аляксандр Лукашэнка ёміста дасць зразумець, што краіна не прадаецца ні за што на свеце, скажа аб тым, як мы будзем развівацца, як будзем умацоўваць суверэнітэт і незалежнасць", - дадаў дэпутат.
Яшчэ адной тэмай паслання, як чакае Ігар Марзалюк, стануць развіццё Саюзнай дзяржавы, ЕАЭС, АДКБ. "Гэта вельмі важны момант. Беларусь заўсёды была верным саюзнікам і заўсёды выконвала ўзятыя на сябе абавязацельствы", - падкрэсліў парламентарый.
"Нашы прэтэнзіі зводзяцца да аднаго - роўнасць умоў, канкурэнцыі, выкананне ўзятых на сябе абавязацельстваў нашымі партнёрамі", - дадаў ён.
Сёння згодна з законам аб Нацыянальным сходзе і рэгламентам Палаты прадстаўнікоў дэпутаты прынялі рашэнне аб правядзенні сумеснага пасяджэння палат парламента для заслухоўвання звароту Прэзідэнта Аляксандра Лукашэнкі са штогадовым Пасланнем беларускаму народу і Нацыянальнаму сходу.
Як паведамлялася, старшыня Палаты прадстаўнікоў Уладзімір Андрэйчанка аб'явіў адкрытай пазачарговую сесію ў адпаведнасці з указам ад 24 ліпеня 2020 года нумар 294.
Парламентарыі ратыфікавалі выканаўчую праграму паміж урадамі Беларусі і Егіпта аб супрацоўніцтве ў сферы вышэйшай і паслявузаўскай адукацыі. Прыняты праект закона аб далучэнні Беларусі да пратакола аб абмене інфармацыяй у электронным выглядзе паміж краінамі СНД для ажыццяўлення падатковага адміністравання.
Акрамя таго, Палата прадстаўнікоў ратыфікавала пагадненне аб асаблівасцях ажыццяўлення аперацый з каштоўнымі металамі і каштоўнымі камянямі ў ЕАЭС.-0-
