Мабільная версія
ДЗЯРЖОРГАНЫ

Апошнія навіны
Усе навіны

Віктар Назаранка: Генеральная асамблея МЭК пройдзе ў 2015 годзе ў Мінску

Інтэрв'ю 15.10.2014 | 14:45
У 2015 годзе Мінск упершыню прыме Генеральную асамблею Міжнароднай электратэхнічнай камісіі (МЭК). Гэта буйнейшы бізнес-форум, своеасаблівая "тэхнічная Алімпіяда". Аб значэнні такога мерапрыемства для Беларусі, асноўных задачах і мэтах форуму, а таксама этапах падрыхтоўкі да яго правядзення ў інтэрв'ю карэспандэнту БЕЛТА расказаў старшыня Дзяржаўнага камітэта па стандартызацыі Віктар Назаранка.

-Віктар Уладзіміравіч, абрэвіятура МЭК і нават яе расшыфроўка мала аб чым гавораць не толькі простаму абывацелю, але і некаторым спецыялістам. Таму перш чым перайсці да тэмы правядзення Генасамблеі  МЭК у Мінску, растлумачце, што ж гэта за арганізацыя - Міжнародная электратэхнічная камісія?


- Міжнародная электратэхнічная камісія існуе з 1906 года. Гэта адна са старэйшых арганізацый у свеце, якая спецыялізуецца на распрацоўцы і публікацыі міжнародных стандартаў, а таксама ацэнцы і пацвярджэнні адпаведнасці электратэхнічнай прадукцыі гэтым стандартам. Міжнародная электратэхнічная камісія - вядучы глабальны партнёр Сусветнай гандлёвай арганізацыі ў галіне тэхнічнага рэгулявання. МЭК рэгулюе пытанні нарміравання і ацэнкі адпаведнасці прадукцыі, што складае 21 працэнт сусветнага гандлю.

Асноўнай перавагай МЭК перад іншымі аналагічнымі ўтварэннямі з'яўляецца дакладнае вызначэнне сферы дзейнасці - электратэхнічная прадукцыя. Усё, што трапляе ў гэту сферу, пачынаючы з вялікай энергетыкі і заканчваючы спажывецкімі таварамі, належыць да сферы дзейнасці МЭК. Цяпер у рабоце камісіі прымаюць удзел 162 краіны: 81 краіна - член арганізацыі і столькі ж партнёраў.

- Наколькі шырока ў Міжнароднай электратэхнічнай камісіі прадстаўлена Беларусь?

- Наша краіна з'яўляецца паўнапраўным членам МЭК з 1993 года. Беларусь прадстаўлена ў 48 тэхнічных камітэтах са 174, якія працуюць у МЭК. Тэхнічны камітэт - гэта аб'яднанне спецыялістаў канкрэтнай галіны. Напрыклад, гэта можа быць бытавая электратэхніка, аднаўляльныя крыніцы энергіі, прамысловае абсталяванне. У рабоце тэхкамітэта ўдзельнічаюць краіны, для якіх выбраны напрамак уяўляе інтарэс. Вядома, хацелася б, каб Беларусь была прадстаўлена ў МЭК больш шырока - хаця б у 140 тэхнічных камітэтах. Напрыклад, Нарвегія, чыё насельніцтва складае крыху больш як 5 млн чалавек, прадстаўлена ў 164 тэхнічных камітэтах/падкамітэтах МЭК. Амаль 500 экспертаў, усе вядучыя кампаніі краіны задзейнічаны ў гэтай рабоце. Як толькі наша прамысловасць пачне актыўнае жыццё ў тэхнічнай супольнасці стандартызатараў, мы будзем зусім па-іншаму бачыць тое, што адбываецца ў галіне тэхнікі, тэхналогій, абсталявання.

- Што ж стрымлівае актыўнасць?


- Недастаткова высокую актыўнасць можна растлумачыць рознымі прычынамі. З аднаго боку, кіраўнікі і спецыялісты прадпрыемстваў прывыклі, што іх пазіцыю павінен нехта сфармуляваць і адстаяць. З другога - на прадпрыемствах катастрафічна не хапае спецыялістаў у галіне стандартызацыі з веданнем замежнай мовы, якія маглі б на адпаведным узроўні ўдзельнічаць, апаніраваць, адстойваць пазіцыі на пасяджэннях тэхкамітэтаў. І нават калі не гаварыць аб удзеле ў МЭК. Мы востра адчуваем нізкую актыўнасць прадпрыемстваў па ўкараненні міжнародных стандартаў у прамысловасці. Пазітыўным прыкладам можа стаць "Белнафтахім", паколькі ён вымушаны працаваць на знешнія рынкі і выконваць усе патрабаванні, якія прад'яўляюцца ў кантрактах. Можна таксама адзначыць машынабудаўнікоў, якія актыўна працуюць на экспарт.

- Ці можа правядзенне ў Мінску Генасамблеі МЭК стаць паваротным пунктам, пасля якога наш рэальны сектар пачне актыўней працаваць у гэтым напрамку?

- Калі мы прапаноўвалі правесці Генасамблею МЭК у Мінску, зыходзілі з двух аспектаў. Перш за ўсё, мы хочам, каб у Беларусь прыехалі прафесіяналы ў галіне электратэхнікі больш як са 160 краін свету, абмеркавалі набалелыя пытанні, паглядзелі на нашу краіну, прамысловасць, інфраструктуру, заключылі дамоўленасці, выйшлі на якія-небудзь перспектыўныя інвестыцыйныя праекты. Ну і, вядома, мы разлічваем, што ўсё ж разбудзім наш рэальны сектар, паколькі працаваць у напрамку адпаведнасці прадукцыі міжнародным стандартам жыццёва неабходна.

- Раней ніводная з краін постсавецкай прасторы не ўдастойвалася гонару прыняць у сябе Генеральную асамблею МЭК. Чаму, на  ваш погляд, менавіта Беларусі было даверана права правядзення глабальнага форуму?

- Пры прыняцці рашэння аб правядзенні Генасамблеі МЭК вялікае значэнне ўдзяляецца стабільнасці эканамічнай сістэмы, таму, наколькі краіна дэманструе інтарэс да інавацый, стварае ўмовы для інвестыцый. Беларусь можна назваць адной з краін, дзе за апошнія гады створана шмат прывабных стымулаў, якія ўяўляюць інтарэс для замежных партнёраў. Акрамя таго, наша краіна і нашы тэхнічныя спецыялісты на ўсіх этапах займалі і займаюць актыўную пазіцыю ў галіне тэхнічных распрацовак. Мы можам смела гаварыць аб тым, што асноўную колькасць дакументаў дагаворна-прававой базы ў Мытным саюзе зрабілі спецыялісты Рэспублікі Беларусь. Ну і, вядома, тэрытарыяльнае размяшчэнне: усё ж такі Беларусь у цэнтры Еўропы, знаходзіцца на мяжы розных эканамічных сістэм.

- Раскажыце аб ходзе падрыхтоўкі да Генеральнай асамблеі МЭК у Мінску. Ці гатова беларуская сталіца да такой знакавай міжнароднай падзеі? На чым будуць сканцэнтраваны намаганні ў бліжэйшы час?

- Падрыхтоўка да правядзення Генеральнай асамблеі МЭК дзеліцца на два этапы. Першы - гэта работа, звязаная з арганізацыйнымі мерапрыемствамі. Маецца на ўвазе выбар месц правядзення, вызначэнне крыніц фінансавання, прыцягненне спонсараў. У якасці асноўных пляцовак для правядзення рабочых пасяджэнняў МЭК выбраны нацыянальны алімпійскі камітэт, гасцінічныя комплексы "Вікторыя" і культурна-спартыўны комплекс "Мінск-Арэна". Другі этап звязаны з падрыхтоўкай пасяджэнняў тэхнічных камітэтаў, якія пройдуць у час Генасамблеі. Што датычыцца гэтага, частку шляху мы прайшлі ўжо: мы выдзелілі тыя сферы дзейнасці МЭК, што ўяўляюць інтарэс для Беларусі, у рамках гэтых напрамкаў напрацавалі пералікі спецыялістаў ад розных арганізацый, якія хацелі б удзельнічаць у тэхкамітэтах. Цяпер ідуць узгадненні, прадстаўнікі якіх тэхкамітэтаў прыедуць у Мінск і прымуць удзел у пасяджэннях.

- Як Беларусі максімальна эфектыўна выкарыстаць гэты шанц, у тым ліку для прыцягнення інвестыцый у эканоміку краіны?

- У час Генеральнай асамблеі МЭК, як правіла, падпісваюцца перспектыўныя інвестыцыйныя праекты. Краіны-гаспадыні правядзення мерапрыемстваў такога ўзроўню атрымліваюць значныя палітыка-эканамічныя дывідэнды, павышаюць інвестыцыйную прывабнасць краіны, у тым ліку за кошт дэманстрацыі высокага ўзроўню развіцця навукі і тэхнікі, інжынернага развіцця. У сувязі з гэтым асноўная праблема заключаецца ў тым, каб пераканаць прамысловасць актыўна ўключацца ў падрыхтоўчыя мерапрыемствы да правядзення Генасамблеі МЭК, фарміравання перспектыўных прапаноў для перагавораў і тым самым пашыраць свае інтарэсы на знешнім рынку. Тое, што пэўная частка беларускіх прадпрыемстваў стане актыўным членам міжнародных тэхнічных камітэтаў, установіць партнёрскія адносіны, падпіша канкрэтныя інвестыцыйныя дагаворы з сусветнымі кампаніямі на стварэнне сумесных прадпрыемстваў або філіялаў, будзе самым значным вынікам Генасамблеі МЭК у Мінску. Сёння мы вядзём работу па рэфармаванні Нацыянальнага камітэта Беларусі ў МЭК, асноўнай мэтай якога і з'яўляецца рэалізацыя вышэйпералічаных задач. Вельмі важна, каб замежныя госці, якія два тыдні будуць знаходзіцца ў нашай краіне, адчулі, што Беларусь - гэта партнёр, з якім можна адкрыта працаваць у самых розных галінах, у тым ліку вытворчасці і ўзаемных пастаўках прадукцыі.

Юлія Дылянок
Версія для друку
Надвор'e
Мінск
Баранавічы
Бабруйск
Барысаў
Брэст
Варшава
Вільнюс
Віцебск
Гомель
Гродна
Жлобін
Кіеў
Кіеў
Ліда
Мінск
Магілёў
Магілёў
Мозыр
Масква
Орша
Полацк
Рыга
Санкт-Пецярбург
Салігорск
Салігорск

Інфаграфіка

Беларусь у рэйтынгу дзяржаў па індэксе развіцця чалавека Штогадовыя глабальныя даклады аб чалавечым развіцці публікуюцца ПРААН з 1990 года.