Мемарыял "Буйніцкае поле" - сімвал мужнасці і храбрасці ў гады Вялікай Айчыннай вайны.
Мемарыял захоўвае памяць аб героях - абаронцах Магілёва.
Гераічная абарона горада
У пачатку ліпеня 1941 года савецкія воіны, міліцыянеры, народныя апалчэнцы 23 дні трымалі абарону Магілёва.
Асабліва бязлітасныя баі ішлі на Буйніцкім полі, дзе нямецкім танкавым армадам процістаялі пехацінцы 388-га стралковага палка пад камандаваннем палкоўніка С.Куцепава і агнявыя разлікі 340-га артпалка палкоўніка І.Мазалава.
12 ліпеня 1941 года адбыўся самы бязлітасны бой, які працягваўся 14 гадзін: артылерыйскі абстрэл чаргаваўся з танкавымі атакамі.
Мемарыял "Буйніцкае поле"
На полі воінскай славы ў 1962 годзе ўстаноўлены абеліск, у 1995 годзе адкрыты мемарыяльны комплекс.
У цэнтры мемарыяла 27-метровая капліца - сімвал велічы воінскага духу.
Унутры размешчаны мармуровыя дошкі з імёнамі абаронцаў Магілёва.
У цэнтры капліцы - "маятнік Фуко", сімвал вечнага жыцця.
На ўзвышшы ў цэнтры - "Кніга памяці" Буйніцкага мемарыяла.
Алеі злучаюць капліцу з аркай, памятным каменем пісьменніку К.Сіманаву*.
Вакол размешчаны ўзоры баявога ўзбраення і тэхнікі перыяду вайны.
Справа ад капліцы - рэшткі процітанкавага рова.
Недалёка размешчаны вадаём "Возера Слёз" - сімвал слёз маці, якія страцілі сваіх сыноў у гады вайны.
Музей Славы Магілёўскай вобласці
У 2023 годзе на Буйніцкім полі пачалося будаўніцтва музейнага комплексу Воінскай Славы Магілёўскай вобласці.
Архітэктура будынка - у выглядзе ордэна Айчыннай вайны**.
Мемарыяльны комплекс "Буйніцкае поле" з'яўляецца цэнтрам патрыятычнага выхавання моладзі. Тут праводзяцца вахты памяці, урокі мужнасці, сустрэчы з ветэранамі.
*У нарысе "Гарачы дзень" К.Сіманава ў газеце "Известия" 20 ліпеня 1941 года быў змешчаны сенсацыйны рэпартаж і была паказана панарама дзясяткаў падбітых варожых танкаў.
"Я не быў салдатам, быў усяго толькі карэспандэнтам, аднак у мяне ёсць кавалачак зямлі, які мне век не забыць, - поле пад Магілёвам, дзе я ўпершыню ў ліпені 1941 года бачыў, як нашы на працягу аднаго дня падбілі і спалілі 39 нямецкіх танкаў..." - пісаў пазней К.Сіманаў.
**У 1980 годзе горад Магілёў узнагароджаны ордэнам Айчыннай вайны I ступені за мужнасць і стойкасць.
Крыніца: Музей гісторыі Магілёва, адкрытыя крыніцы.