9 чэрвеня, Мінск /Кар. БЕЛТА/. Выпускныя вечары ў Беларусі праводзіліся 8 і 9 чэрвеня.
У Брэсце
У Брэсце 8 чэрвеня ўрачыстым шэсцем прайшлі выпускнікі сярэдніх школ горада. У гэтым годзе атэстат атрымалі 2265 выпускнікоў сярэдняй школы, з якіх 129 уладальнікаў залатога і сярэбранага медаля, і 3089 выпускнікоў базавай школы. Фіналам дня стала штогадовае свята для выпускнікоў Ленінскага раёна г. Брэста "Пунсовыя ветразі".
У Гродне
Больш за 200 гродзенскіх выпускнікоў, якія атрымалі па выніках экзаменаў права на медалі, прайшлі па чырвонай дарожцы. Мерапрыемства адбылося 8 чэрвеня ў Гродзенскім абласным драмтэатры. У час урачыстай цырымоніі кіраўнікі горада ўручылі выпускнікам атэстаты і медалі. У гэтым годзе ў Гродзенскай вобласці 6 тыс. выпускнікоў, з іх каля 10% прэтэндуюць на медалі.
У Гомелі
У 2019 навучальным годзе выпускнікамі школ і гімназій Гомеля сталі каля 2,7 тыс. навучэнцаў. Кожны пятнаццаты - медаліст.
У Мінску
У Мінскім ваенным сувораўскім вучылішчы 8 чэрвеня адбыўся выпуск 59 выхаванцаў. З уступленнем у дарослае жыццё іх павіншаваў міністр абароны Андрэй Раўкоў.
У Магілёве
8 чэрвеня прайшоў святочны вечар для выпускнікоў Магілёўскага дзяржаўнага абласнога ліцэя № 3. У гэтым годзе сярод выпускнікоў навучальнай установы 19 медалістаў. З іх 16 чалавек атрымалі залатыя медалі.-0-
Фота Вадзіма Якубёнка, Леаніда Шчаглова, Сяргея Халадзіліна, Раміля Насібуліна, Алега Файніцкага
