2 чэрвеня, Мінск /Кар. БЕЛТА/. На Беларускай універсальнай таварнай біржы за 15 гадоў праведзена 3,2 млн здзелак на агульную суму $21 млрд, паведаміў карэспандэнту БЕЛТА прэс-сакратар БУТБ Раман Яніў.
Першыя біржавыя таргі на БУТБ адбыліся 2 чэрвеня 2005 года. У час гэтых таргоў беларускае УП "Беллесэкспарт" і польская International Paper Kwidzyn S.A. заключылі першую біржавую здзелку па рэалізацыі балансавай драўніны на суму $189 тыс. "З таго часу на БУТБ праведзена 3,2 млн здзелак на агульную суму $21 млрд, а аб'ём экспарту склаў $5,8 млрд. Найбольш запатрабаванымі таварамі на ўнутраным рынку з'яўляюцца круглыя лесаматэрыялы, вырабы з чорных металаў і шроты алейных культур, у той час як ільвіная доля знешнегандлёвых здзелак прыпадае на піламатэрыялы і малочную прадукцыю", - расказаў Раман Яніў.
Сёння на БУТБ акрэдытавана каля 24 тыс. кампаній, уключаючы 4,7 тыс. нерэзідэнтаў з 63 краін. Усе таргі праводзяцца ў электроннай форме па пяці таварных секцыях: металапрадукцыя, лесапрадукцыя, сельгаспрадукцыя, прамысловыя і спажывецкія тавары і перспектыўныя біржавыя тавары.
Паводле падлікаў аналітыкаў, за 15 гадоў дзякуючы рыначнаму механізму цэнаўтварэння і высокай канцэнтрацыі попыту і прапанавання на біржавой пляцоўцы беларускія суб'екты гаспадарання атрымалі дадатковую выручку і сэканомілі звыш $1,3 млрд.-0-