Законапраект аб рэспубліканскім бюджэце на 2025 год адобраны Саветам Рэспублікі

12 снежня, Мінск /Кар. БЕЛТА/. На пасяджэнні другой сесіі Савета Рэспублікі Нацыянальнага сходу восьмага склікання адобраны праект закона "Аб рэспубліканскім бюджэце на 2025 год", перадае карэспандэнт БЕЛТА.

У 2025 годзе даходы рэспубліканскага бюджэту плануюцца ў памеры Br45 835,8 млн, што на 8,1 працэнта больш, чым ацэнка паступленняў 2024 года. Павелічэнне паступленняў у бюджэт абумоўлена як прагназуемым ростам эканомікі, так і спецыяльнымі мерамі ў рамках бюджэтнай кансалідацыі, у тым ліку індэксацыяй падатковых ставак, устаноўленых у абсалютных велічынях, на прагнозны індэкс росту спажывецкіх цэн, павелічэннем ставак акцызаў з улікам міжнародных абавязацельстваў, пашырэннем падатковых баз шляхам павышэння якасці падатковага адміністравання, адменай малаэфектыўных падатковых ільгот.

Расходы ў 2025 годзе рэспубліканскага бюджэту плануюцца ў суме Br50 295,2 млн (з ростам на 12 працэнтаў да ацэнкі 2024 года).

Прыярытэтнымі напрамкамі бюджэтнай палітыкі ў 2025 годзе застануцца сацыяльная сфера, павышэнне дабрабыту грамадзян за кошт павелічэння памеру заработнай платы, забеспячэнне нацыянальнай бяспекі, падтрымка рэальнага сектара эканомікі.-0-