28 кастрычніка, Мінск /Кар. БЕЛТА/. Забастоўкі на вытворчай пляцоўцы недапушчальныя. Такое меркаванне выказаў выданню "СБ. Беларусь сегодня" дырэктар ААТ "Славянка" Тэймураз Бачарышвілі, паведамляе БЕЛТА.
Гаворачы пра работу фабрыкі, дырэктар адзначыў, што без няспыннага паляпшэння, мадэрнізацыі вытворчасці выжыць цяжка. "Я сказаў бы, практычна немагчыма. Мінімум $150-200 тыс. у год ідзе на закупку новага абсталявання", - падкрэсліў ён. Прадпрыемства развівае і сваю тавараправодную сетку, супрацоўнічае з інтэрнэт-магазінамі.
"З ростам вытворчасці расце і зарплата работнікаў фабрыкі. Людзі прыходзяць да нас зарабляць грошы. А што яны атрымаюць, не падыходзячы да станка? Нічога, - сказаў Тэймураз Бачарышвілі. - Плюс да гэтага кожны работнік удзельнічае ў выкананні дагавораў, падпісаных кіраўніцтвам. Не адгрузіць наша прадпрыемства тавар, парушыць кантракт - разарвуцца сувязі. Ці выйграе ад гэтага канкрэтны рабочы? Вельмі сумняваюся. Не спрачаюся, работнікі могуць выказваць свае прэтэнзіі, калі на асобна ўзятых фабрыцы або заводзе дрэнныя ўмовы працы, зарплата ніжэйшая за пражытачны мінімум, парушаецца калектыўны дагавор. Але ў такім выпадку ім трэба збірацца разам з адміністрацыяй і знаходзіць агульную мову. Што датычыцца розных забастовак па палітычных матывах, то на вытворчай пляцоўцы яны наогул недапушчальныя".
Тое, што ад атрыманай выручкі залежыць зарплата, а дэструктыўныя дзеянні толькі пагоршаць сітуацыю, разумеюць і работнікі фабрыкі. "Мы пастаянна заняты. Такога, што прыходзіш на змену, а рабіць няма чаго, не было. Ну а калі ёсць работа, гэта значыць і зарплата. І ў нас на прадпрыемстве яна нядрэнная", - падзялілася швачка Лідзія Есіна.
Пагадзілася з калегай і тэрмаапрацоўшчыца Наталля Дзядкова: "Нам грэх скардзіцца. Я, напрыклад, адна выхоўваю дзіця, але змагла пабудаваць кватэру. Наша праца добра аплачваецца. Галоўнае - не ленавацца. Што ў мяне зменіцца, каб дзеля нейкіх уяўных даброт выходзіць на вуліцу? Ды нічога. Каб жыць, трэба працаваць. Каб жыць добра, трэба працаваць шмат".
ААТ "Славянка" - адно з буйнейшых прадпрыемстваў лёгкай прамысловасці, уваходзіць у склад канцэрна "Беллегпрам". Спецыялізуецца на выпуску адзення для дарослых і дзяцей. Вытворчая магутнасць - каля 600 тыс. вырабаў у год.-0-
