21 кастрычніка, Мінск /Кар. БЕЛТА/. Важна спалучаць унутраны і знешні кантроль у сферы дзяржзакупак, каб мінімізаваць магчымасці парушэнняў, як ненаўмысных, так і наўмысных. Такое меркаванне выказаў 21 кастрычніка журналістам намеснік старшыні Камітэта дзяржаўнага кантролю Дзмітрый Баско перад сумесным семінарам КДК Беларусі і Падліковай палаты Расійскай Федэрацыі па тэме ўдасканалення кантролю ў сферы дзяржаўных закупак, перадае карэспандэнт БЕЛТА.
Ва ўсім свеце сродкі на ажыццяўленне дзяржзакупак складаюць значную долю ў расходах бюджэту, і Беларусь не выключэнне. "Па выніках першага паўгоддзя заключана больш за 200 тыс. дагавораў на суму практычна Br3,7 млрд. Зразумела, што кантроль неабходны. Гэта сфера з высокімі рызыкамі з пункту гледжання магчымых карупцыйных, махлярскіх дзеянняў. Трэба ўдзяляць асаблівую ўвагу адразу двум напрамкам кантролю: як знешняму, так і ўнутранаму. Унутраны кантроль з боку органаў улады, дзяржорганаў у частцы антыкарупцыйных праяў павінен арганічна дапаўняцца знешнім кантролем з боку кантралюючых і праваахоўных органаў", - сказаў Дзмітрый Баско.
На яго думку, даволі шмат прабелаў якраз звязана з унутраным кантролем. Што ў пэўнай ступені залежыць ад кампетэнцыі спецыялістаў, якія працуюць у сферы дзяржзакупак. "У нас у краіне праводзіцца даволі шмат розных семінараў, вучэбных заняткаў для спецыялістаў, якія ажыццяўляюць непасрэдна дзяржзакупкі. Гэта важны напрамак прафілактыкі, каб не дапусціць парушэнні ненаўмыснага характару, інакш кажучы ўчыненыя з-за няведання, але якія тым не менш вядуць да прыцягнення да адказнасці", - адзначыў Дзмітрый Баско.
У той жа час, падкрэсліў ён, маюць месца выпадкі наўмыснага парушэння заканадаўства ў мэтах атрымання асабістай выгады. Яны нярэдка ўстанаўліваюцца пры кантрольных мерапрыемствах.
У цэлым практыка кантрольнай работы паказвае тыповыя парушэнні ў гэтай сферы: недастаткова якаснае даследаванне рынку і фармальнае вызначэнне арыенціровачнага кошту прадмета дзяржзакупкі, парушэнні выканання заключаных дагавораў, унясенне не прадугледжаных законам змяненняў у гэтыя дагаворы, неправамерныя адхіленне прапанавання ўдзельніка таргоў і выбар пераможцы.
Сумесны семінар праходзіць у рэжыме відэа-канферэнц-сувязі. Адметная асаблівасць яго ў тым, што акрамя цэнтральных офісаў кантралюючых органаў дзвюх краін у ім удзельнічаюць прадстаўнікі кантрольна-падліковых органаў 84 суб'ектаў РФ, муніцыпальных утварэнняў, а таксама работнікі абласных камітэтаў дзяржкантролю Беларусі.
"Гэты семінар уяўляе сабой цікавасць як для расійскага боку, так і для Камітэта дзяржкантролю Рэспублікі Беларусь. У нас ёсць чым падзяліцца", - дадаў Дзмітрый Баско.
Беларускія спецыялісты растлумачваюць расійскім калегам свае падыходы да кантрольных мерапрыемстваў, дзеляцца вопытам ацэнкі магчымых рызык у сферы дзяржзакупак. Як прыклад - праверка арганізацыі школьнага харчавання, дзе дзяржкантралёры выявілі парушэнні, звязаныя са змяненнямі цаны і аб'ёму заключаных дагавораў. Пасля ўмяшання КДК дагаворы прыведзены ў адпаведнасць з патрабаваннямі заканадаўства, а залішне зрасходаванныя сродкі вернуты ў бюджэт.
Таксама расіянам прадстаўлена інфармацыя аб асаблівасцях беларускага нацыянальнага заканадаўства ў сферы дзяржзакупак. У тым ліку - аб дзяржаўнай інфармацыйна-аналітычнай сістэме па кіраванні дзяржзаказамі (ДІАС), якая створана Міністэрствам антыманапольнага рэгулявання і гандлю. Асноўная мэта ДІАС - магчымасць аналізаваць увесь жыццёвы цыкл закупак, пачынаючы з іх планавання і завяршаючы выкананнем кантрактаў. І, лічаць у КДК, пры наладжанай рабоце гэтай сістэмы выпадкі парушэння заканадаўства шляхам змянення ўмоў дагавораў павінны быць практычна выключаны.
"Як Падліковая палата РФ, так і Камітэт дзяржкантролю Беларусі зацікаўлены ў тым, каб бюджэтныя сродкі расходаваліся максімальна эфектыўна. Нам трэба працаваць на папярэджанне, каб не дапусціць парушэнняў і растрат", - сказаў на заканчэнне Дзмітрый Баско.-0-
