Сцяг Чацвер, 28 сакавіка 2024
Усе навіны
Усе навіны
Эканоміка
21 верасня 2020, 14:15

Выбудоўванне партнёрскіх кантактаў з рэгіёнамі Расіі вельмі важна для Беларусі - Галоўчанка

21 верасня, Мінск /Кар. БЕЛТА/. Выбудоўванне ўзаемавыгадных партнёрскіх кантактаў з рэгіёнамі Расіі вельмі важна для Беларусі. Такое меркаванне выказаў прэм'ер-міністр Беларусі Раман Галоўчанка на сустрэчы з губернатарам Прыморскага края Алегам Кажамякам, перадае карэспандэнт БЕЛТА.

"Ваш візіт у гэты час з'яўляецца для нас вельмі важным. Вы ведаеце, што, як у ходзе перадвыбарнай кампаніі Беларусі, так і пасля яе, наша краіна сутыкнулася з беспрэцэдэнтным знешнім націскам. Не спыняюцца спробы ўмяшання ў нашы ўнутраныя справы і спробы расхістаць сітуацыю, дэстабілізаваць абстаноўку ў краіне і ператварыць яе ў хаос. Гэтага дабіваюцца ворагі нашай краіны. У такіх умовах асабліва важна дружалюбная падтрымка", - адзначыў кіраўнік беларускага ўрада.

Раман Галоўчанка падкрэсліў каштоўнасць беларуска-расійскіх адносін: "Гэта для нас шмат што значыць. Прадаўжаецца інтэнсіфікацыя двухбаковых кантактаў. У пачатку верасня Мінск наведаў старшыня ўрада Расіі Міхаіл Мішусцін, з якім мы падрабязна абмеркавалі бягучую сітуацыю двухбаковых адносін, і ў першую чаргу эканамічных, намецілі меры па яе актывізацыі". Прэм'ер-міністр нагадаў, што на мінулым тыдні ў Сочы прэзідэнты Беларусі і Расіі правялі канструктыўны дыялог, у час якога абодва бакі падкрэслілі неабходнасць інтэнсіфікацыі рэгіянальнага супрацоўніцтва, актывізацыі прамых кантактаў паміж прадпрыемствамі і арганізацыямі. "Лідары нашых дзяржаў дамовіліся актывізаваць супрацоўніцтва паміж Беларуссю і рэгіёнамі Расійскай Федэрацыі, паколькі гэта фундамент эканамічных адносін. Расія - вялікая краіна і тэрытарыяльна, і па колькасці насельніцтва, таму курс на выбудоўванне ўзаемавыгадных партнёрскіх і дружалюбных кантактаў з рэгіёнамі Расіі з'яўляецца вельмі важным для нас", - адзначыў Раман Галоўчанка.

Паводле слоў кіраўніка ўрада, Прыморскі край - адзін з ключавых партнёраў Беларусі з Далёкаўсходняй федэральнай акругі. "У 2019 годзе наш тавараабарот павялічыўся на 8,4 працэнта, а ў студзені - чэрвені бягучага года ўжо на 17,7 працэнта. Тым не менш я ўпэўнены, што на гэтым спыняцца нельга, ёсць вялікія магчымасці і рэсурсы для развіцця гэтай дадатнай тэндэнцыі, і перш за ўсё ў сферы прамысловасці. Прыморскі край вельмі багаты на карысныя выкапні, прыродныя рэсурсы, таму мы, нягледзячы на геаграфічную аддаленасць, ганарымся, што ўносім свой уклад у яго прамысловае, індустрыяльнае і інвестыцыйнае развіццё. Але трэба больш актыўна працаваць над стварэннем гандлёвых каналаў паміж прадпрыемствамі. Яшчэ адзін цікавы напрамак для ўзаемадзеяння - экалагічнае супрацоўніцтва", - лічыць ён.

Губернатар Прыморскага края Алег Кажамяка таксама падкрэсліў важнасць супрацоўніцтва з Беларуссю. "У нас амаль 30 працэнтаў насельніцтва края з беларускімі каранямі, адносіны з Беларуссю маюць для нас гістарычную аснову, таму наш візіт падтрымлівае большасць жыхароў края. Прадукцыю беларускай вытворчасці, як машынабудаўнічую, так і сельскагаспадарчую, ведаюць жыхары Далёкага Усходу, і яна выклікае павагу. Таму, вядома, мы зацікаўлены ў супрацоўніцтве, пастаўках прадукцыі і рэалізацыі беларускіх тавараў народнага спажывання. Я думаю, што нашы невялікія таварныя адносіны маюць магчымасць значна павялічыцца", - сказаў губернатар.-0-

Падпісвайцеся на нас у
Twitter
Топ-навіны
Свежыя навіны Беларусі