23 ліпеня, Мінск /Кар. БЕЛТА/. У Беларусі за чэрвень валавы ўнутраны прадукт дэманструе рост на 0,1 працэнта. Аб гэтым паведаміў журналістам прэм'ер-міністр Раман Галоўчанка па выніках нарады Прэзідэнта з кіраўніцтвам эканамічнага блока краіны, перадае карэспандэнт БЕЛТА.
"Беларусь глыбока інтэгравана ў сусветную эканоміку, у міжнародныя кааперацыйныя сувязі, у нас адкрытая, экспартна арыентаваная эканоміка. Таму на нас гэта (складаная эканамічная сітуацыя ў свеце. - Заўвага БЕЛТА) не магло не паўплываць", - прызнаў прэм'ер-міністр.
Аднак, паводле слоў Рамана Галоўчанкі, дзякуючы своечасовым рашэнням, прынятым кіраўніцтвам краіны, страты ВУП у гэтым годзе значна меншыя, чым у краінах-суседках з больш моцнымі эканомікамі. "Каб не страціць рынкі і своечасова паспець да іх адкрыцця, мы не закрывалі вытворчасць. Недзе зніжаліся абароты з-за таго, што былі разарваны вытворча-збытавыя ланцужкі, але ў прынцыпе мы маем нядрэнныя паказчыкі на фоне нашых суседзяў", - адзначыў ён.
Паводле даных прэм'ер-міністра, ВУП Беларусі па выніках паўгоддзя склаўся на ўзроўні 98,3 працэнта. "За чэрвень мы прыраслі на 0,1 працэнта і думаем, што будзем расці далей, - сказаў ён. - Хоць многія нашы суседзі загадзя прызналі, што гэта немагчыма, і запланавалі для сябе спад: ад 10 працэнтаў у еўразоне да 6 працэнтаў у Расіі".
У беларускім урадзе разлічваюць выканаць задачы, пастаўленыя кіраўніком дзяржавы, і як мінімум захаваць ВУП на ўзроўні 2019 года. Для такіх прагнозаў ёсць абнадзейлівыя перадумовы. "На фоне ўсіх астатніх негатыўных навін ёсць пазітыўная пра добры ўраджай, трэба ёй скарыстацца, сабраць ураджай, не страціць. Упершыню, напэўна, за многія гады, сітуацыя ў нябеснай канцылярыі складваецца для аграрыяў паспяховая. Трэба ёй скарыстацца, - заклікаў прэм'ер-міністр. - Задача сёння - не страціць ураджай. Попыт на прадукты харчавання вялікі". Беларусь за апошні час ужо змагла істотна нарасціць экспарт прадуктаў харчавання і забяспечыць прыток валюты ў краіну. У гэтым годзе ёсць усе ўмовы для наступнага росту экспарту сельгаспрадукцыі.-0-
