14 сакавіка, Мінск /Кар. БЕЛТА/. У бягучым годзе Беларусь прадоўжыць нарошчваць аб'ёмы паставак прадуктаў харчавання ў Расію, заявіў журналістам намеснік прэм'ер-міністра Леанід Заяц на палях II Беларускага харчовага форуму ў Санкт-Пецярбургу, паведамілі карэспандэнту БЕЛТА ў прэс-службе беларускага ўрада.
За мінулы год Беларусі ўдалося на трэць павялічыць тавараабарот з Расіяй, узрасла і колькасць паставак. "На рынак Санкт-Пецярбурга за мінулы год пастаўлена прадуктаў харчавання на суму $667 млн - гэта сыры, малако, хлебабулачныя, кандытарскія вырабы і іншае. А ў цэлым у Расію за 2022 год пастаўлена харчовай прадукцыі на суму амаль $6 млрд. Мы нарошчваем сваю прысутнасць на расійскім рынку. Гэты год плануем завяршыць не горш за папярэдні", - сказаў віцэ-прэм'ер.
II Беларускі харчовы форум праходзіць у Санкт-Пецярбургу 14 і 15 сакавіка. Яго мэта - павелічэнне паставак прадуктаў харчавання з Рэспублікі Беларусь у рознічныя гандлёвыя сеткі рэгіёнаў Расійскай Федэрацыі. Мерапрыемства сабрала вялікую колькасць зацікаўленых. Больш за 20 прадпрыемстваў перапрацоўчай прамысловасці Беларусі прадстаўляюць шырокі асартымент харчовых тавараў. "Нашы прадпрыемствы прадстаўлены дастойна. У спажыўцоў Ленінградскай вобласці ёсць цікавасць, таму што Беларусь дэманструе вельмі якасны прадукт, які карыстаецца вялікай папулярнасцю", - адзначыў намеснік прэм'ер-міністра.
Паводле яго слоў, на палях форуму ідуць дыскусіі наконт паляпшэння якасці і пашырэння лінейкі выпускаемай прадукцыі. "Мы зацікаўлены ў пэўных прадуктах Расійскай Федэрацыі і хочам зблізіць нашы інтарэсы ў тэхналогіях вытворчасці і перапрацоўкі. У прыватнасці, Ленінградская вобласць вельмі развіты рэгіён у пытаннях жывёлагадоўлі, вытворчасці малака. Тут спалучаюцца тэхналогіі з высокімі арганізатарскімі якасцямі кіраўнікоў, якія выкарыстоўваюць лепшыя падыходы жывёлагадоўлі. Самае галоўнае - тут ёсць тыя людзі, што аддаюць сябе цалкам любімай справе", - падкрэсліў Леанід Заяц.-0-
