15 красавіка, Гомель /Кар. БЕЛТА/. Прадпрыемствы Гомельскай вобласці маюць намер удзельнічаць у будаўнічых праектах, рамонце дарог у Бранскай вобласці. Перспектывы супрацоўніцтва бакі абмеркавалі падчас візіту дэлегацыі Гомельскай вобласці ў Бранскую, паведаміла карэспандэнту БЕЛТА прэс-сакратар Гомельскага аблвыканкама Вольга Рабікава.
На сустрэчы губернатар Бранскай вобласці Аляксандр Багамаз адзначыў: расійскі рэгіён зацікаўлены ва ўдзеле беларускіх суседзяў ва ўзвядзенні сацыяльна значных аб'ектаў, дарог. Старшыня Гомельскага аблвыканкама Генадзь Салавей і прадстаўнікі гомельскіх кампаній агучылі канкрэтныя прапановы.
Так, Гомельскі ДБК на наступным тыдні мае намер заключыць дагавор з Бранскам на будаўніцтва ў раённым цэнтры Жукаўка двух аднапад'езных чатырохпавярховых дамоў. "Гэта сацыяльнае жыллё. Агульная плошча яго складзе 2,7 тыс. кв.м. Праектныя работы плануюць пачаць ужо ў красавіку, будаўніцтва пачнуць у чэрвені-ліпені. Згодна з дагаворам, за гомельскімі будаўнікамі - каробкі, аддзелку расійскія калегі зробяць уласнымі сіламі", - удакладніла Вольга Рабікава. Таксама бакі прапрацоўваюць пытанне аб узвядзенні беларускімі будаўнікамі 16-павярховага дома ў Бранску.
Дарожна-будаўнічы трэст нумар 2 гатовы прапанаваць асфальтабетон на мадыфікаваным бітуме. Прадукцыя дазваляе палепшыць якасць верхніх слаёў асфальтабетону, павялічыць тэрміны эксплуатацыі пакрыцця. Паводле інфармацыі прадпрыемства, такі вопыт добра зарэкамендаваў сябе, у тым ліку і на дарогах Расіі. У 2017-2019 гадах трэст выкарыстаў тэхналогію на трасе М1 пад Масквой. Таксама арганізацыя можа паўдзельнічаць у рамонце аўтамабільных дарог у Бранску і вобласці.
Выконваць розныя будаўніча-мантажныя работы, узводзіць "пад ключ" сацыяльна значныя аб'екты гатовы і будаўнічы трэст нумар 14.
Прадметны дыялог партнёры прадоўжаць ужо ў панядзелак, 19 красавіка, калі Гомельскі рэгіён наведае намеснік губернатара Бранскай вобласці Сяргей Цімашэнка.
Прэс-сакратар дадала, што гомельскія будаўнікі таксама зацікаўлены вывучыць вопыт бранскіх калег. Напрыклад, па стварэнні басейнаў з металічнай чашай. Дэталі бакі абмяркуюць у бліжэйшы час.-0-
