28 лістапада, Мінск /Кар. БЕЛТА/. Уступленне Беларусі ў СГА адкрые новыя магчымасці для рэалізацыі праектаў ПРААН. Аб гэтым заявіла сёння журналістам пастаянны прадстаўнік ПРААН у Беларусі Аляксандра Салаўёва, перадае карэспандэнт БЕЛТА.
"Цяпер важны момант для ПРААН: мы рыхтуем новую краінавую праграму на 2021-2025 гады, таму кансультуемся з усімі нацыянальнымі партнёрамі аб тым, якія патрэбны праекты ў адпаведнасці з нацыянальнымі прыярытэтамі на гэты перыяд. Будучае ўступленне ў СГА, якое адкрые новыя эканамічныя магчымасці для Беларусі, таксама запатрабуе пэўнай падтрымкі, каб беларускія прадпрыемствы, галіны маглі атрымаць максімум выгады, - сказала Аляксандра Салаўёва. - Нам хацелася б папрацаваць у галіне прыцягнення інвестыцый у Беларусь, асабліва ў рэгіёны, дзе ёсць найбольшая неабходнасць у рабочых месцах, кропках росту, выхадзе на міжнародныя і рэгіянальныя рынкі. Мы будзем развіваць супрацоўніцтва і рэалізоўваць новыя праекты ў першую чаргу ў гэтай галіне".
Яна падкрэсліла, што ў прыярытэце не толькі забеспячэнне эканамічнага росту, але і сацыяльная справядлівасць, развіццё зялёнай, нізкавугляроднай і цыркулярнай эканомікі. "Да ўсяго гэтага трэба падыходзіць сістэмна", - адзначыла пастаянны прадстаўнік ПРААН у Беларусі.
Цяпер далучэнне да Сусветнай гандлёвай арганізацыі з'яўляецца адной з прыярытэтных задач знешнегандлёвай палітыкі Беларусі. Членства ў СГА дасць магчымасць краіне забяспечыць стабільныя і прадказальныя ўмовы гандлю з краінамі міжнароднай супольнасці, а замежным інвестарам і вытворцам - агульнапрынятыя правілы ажыццяўлення знешнеэканамічнай дзейнасці ў Беларусі. У апошнія гады краіна прадэманстравала значны прагрэс на шляху далучэння да Сусветнай гандлёвай арганізацыі і ўступіла ў такую стадыю перагаворнага працэсу, як фарміраванне падагульняючых абавязацельстваў перад СГА.
Сёння ў час "Тыдня СГА ў Рэспубліцы Беларусь-2019" у Мінску праходзіць круглы стол для бізнес-супольнасці па пытаннях уступлення краіны ў Сусветную гандлёвую арганізацыю. Удзельнікі мерапрыемства разам з нацыянальнымі экспертамі і спецыялістамі ў галіне знешняга гандлю абмяркоўваюць найбольш актуальныя пытанні аб працэсе, статусе і наступствах уступлення ў СГА для прадпрыемстваў і галін, а таксама аб правілах работы на прасторы СГА.
Круглы стол праводзіцца па праекце "Садзейнічанне ўраду Рэспублікі Беларусь пры ўступленні ў Сусветную гандлёвую арганізацыю праз узмацненне экспертнага і інстытуцыянальнага патэнцыялу (5-я фаза)", што фінансуецца ўрадам Расіі і рэалізуецца Праграмай развіцця ААН у партнёрстве з Міністэрствам замежных спраў Беларусі.-0-
