13 верасня, Мінск /Кар. БЕЛТА/. Плануемы ўраджай яблыкаў у гэтым годзе складзе каля 155 тыс.т, у цэлым усіх пладоў і ягад збяруць 164 тыс.т, паведамілі карэспандэнту БЕЛТА ў прэс-службе Міністэрства сельскай гаспадаркі і харчавання.
Сёння ў сельскагаспадарчых арганізацыях Беларусі вядзецца ўборка яблыкаў летне-асенняга тэрміну спажывання. У цэлым па краіне ўжо сабрана больш за 12,5 тыс.т яблыкаў. У асобных гаспадарках рэспублікі ўраджайнасць пладоў дасягае больш за 30 т з 1 га.
Завершана ўборка летніх ягад, у асобных арганізацыях завяршаецца збор буякоў. З ягадных культур засталося ўбраць аронію (рабіну чарнаплодную), журавіны, рэмантантные маліну і суніцы. Паводле аператыўнай інфармацыі, сабрана каля 4 тыс. т ягад.
Каб забяспечыць насельніцтва айчыннай садавінай у міжсезонне, у сховішчы будзе закладзена каля 13,2 тыс. т пладоў. Акрамя таго, сельгасарганізацыі закладваюць на захоўванне яблыкі для рэалізацыі ўнутры рэспублікі і на экспарт. Для гэтых мэт у вытворцаў ёсць пладасховішчы агульнай ёмістасцю 103 тыс. т.
У прэс-службе таксама адзначылі, што ў Беларусі планамерна павялічваюць вытворчасць пладова-ягаднай прадукцыі. Згодна з дзяржпраграмай развіцця аграрнага бізнесу на 2016-2020 гады запланавана штогадовая пасадка садоў на плошчы не меншай за 500 га. За 2016-2018 гады закладзена 2,3 тыс. га садоў.-0-
