13 лютага, Мінск /Кар. БЕЛТА/. Урад патрабуе паскорыць укараненне рыначных механізмаў гандлю сыравінай. Адпаведнае даручэнне па рэалізацыі пілотнага праекта па біржавым гандлі малаком даў першы намеснік прэм'ер-міністра Беларусі Аляксандр Турчын сёння на калегіі Міністэрства антыманапольнага рэгулявання і гандлю, перадае карэспандэнт БЕЛТА.
"Мы атрымаем справядлівую цану на сыравіну і эфектыўную работу двух суб'ектаў гаспадарання - прадаўца і пакупніка. І гэта толькі першы крок. Мы сёння гаворым аб развіцці канкурэнцыі і аднолькавым доступе, у тым ліку да сыравіны, - сказаў Аляксандр Турчын. - У першым квартале 2019 года механізм павінен пачаць працаваць".
Першы віцэ-прэм'ер звярнуў увагу, што сустракаюцца выпадкі, калі ёсць "настойлівыя рэкамендацыі дзяржорганаў, куды здаваць сыравіну". Пры гэтым не прымаецца пад увагу пратэрмінаваная запазычанасць перад перапрацоўчымі прадпрыемствамі.
Як растлумачыў намеснік міністра антыманапольнага рэгулявання і гандлю Іван Вежнавец, размова ідзе пра пілотны праект МАРГ і Беларускай універсальнай гандлёвай біржы па біржавым гандлі малаком (маецца на ўвазе менавіта сыравіна, а не гатовы прадукт). "Мы бачым, што ёсць яшчэ рэзервы для задзейнічання механізмаў рыначнага цэнаўтварэння і ў першую чаргу - на сыравінныя рэсурсы. Сыравіна (малако) будзе набывацца толькі перапрацоўшчыкамі і толькі ў сельгасвытворцаў, у якіх адсутнічае пратэрмінаваная запазычанасць", - удакладніў намеснік міністра.
Плануецца, што МАРГ будзе адсочваць заключаныя па малаку на біржы, але не выкананыя здзелкі. У цэлым пілотны праект павінен садзейнічаць больш эфектыўнаму размеркаванню рэсурсаў, адпаведна, павышэнню эфектыўнасці вытворчасці прадукцыі, а таксама зніжэнню цэн для спажыўцоў.-0-
