16 ліпеня, Мінск /Таццяна Лісатовіч - БЕЛТА/. Праект указа аб ліцэнзаванні знаходзіцца на ўзгадненні ў Адміністрацыі Прэзідэнта. Чакаецца, што дакумент можа быць прыняты да кастрычніка бягучага года. Аб гэтым карэспандэнту БЕЛТА паведаміў намеснік міністра эканомікі Дзмітрый Матусевіч.
Намеснік міністра ўдакладніў, што гэты дакумент быў трансфармаваны з праекта дэкрэта ў праект указа. Цяпер праект дакумента знаходзіцца ў Адміністрацыі. "Спадзяёмся, што ў бліжэйшы час, магчыма, да Форуму рэгіёнаў Беларусі і Украіны, які пройдзе ў Жытоміры (у кастрычніку бягучага года. - Заўвага БЕЛТА), гэты праект у нас ужо будзе ў актыве ў якасці канкрэтнага дакумента, накіраванага, у прыватнасці, на зніжэнне ліцэнзійных патрабаванняў", - адзначыў Дзмітрый Матусевіч.
Паводле яго слоў, канцэптуальныя пасылы, якія былі прадугледжаны праектам дэкрэта, захаваны ў праекце ўказа. "Уносіцца некаторае змяненне ў прынцыпы (ліцэнзавання. - Заўвага БЕЛТА), некаторыя віды ліцэнзавання, умовы. Напрыклад, для нас вельмі важным з'яўляецца адмена строгага патрабавання да пратэрміноўкі праходжання тэхагляду як умовы, па якой кампанію могуць пазбавіць ліцэнзіі. Мы бачым у гэтым страту экспартных паслуг", - расказаў намеснік міністра.
Да канца бягучага года можа быць прыняты і ўказ аб адміністрацыйных працэдурах, паведаміў Дзмітрый Матусевіч. "Праект указа дапрацаваны, ён узгоднены на ўзроўні ўрада з усімі міністэрствамі. Цяпер знаходзіцца на ўзгадненні так званай вялікай пяцёркі, у якую ўваходзяць у тым ліку Камітэт дзяржаўнага кантролю, Вярхоўны суд, Генеральная пракуратура", - сказаў намеснік міністра.
Адказваючы на пытанне аб магчымых тэрмінах прыняцця дакумента, Дзмітрый Матусевіч адзначыў: "Стараемся зрабіць у гэтым годзе. Пакуль усё ідзе да таго, што дакумент чарговы раз (можа, да восені або нават раней) будзе ўнесены на разгляд у Адміністрацыю Прэзідэнта".-0-
