10 лютага, Мінск /Кар. БЕЛТА/. 9 лютага ў індустрыяльным парку "Вялікі камень" адбылося падпісанне пагаднення аб намеры супрацоўніцтва па развіцці праекта ў галіне кітайскай традыцыйнай медыцыны, паведамілі БЕЛТА ў прэс-службе індустрыяльнага парку.
Дакумент падпісалі будучыя заснавальнікі сумеснай біятэхналагічнай кампаніі "Наваэра", адміністрацыя парка і "Кампанія па развіцці індустрыяльнага парка".
Прадпрыемства "Наваэра" будзе створана ў "Вялікім камені" пры ўдзеле Інстытута культуры і эканомікі Цзіньтай, ТАА "Клініка кітайскай медыцыны Сішаньцынсюе (Пекін)" і ТАА "Кампанія фармацэўтычных тэхналогій Сішаньцынсюе (Пекін)".
"Праект прадугледжвае такія напрамкі работы, як стварэнне еўразійскага цэнтра абмену ў галіне культуры традыцыйнай медыцыны, цэнтра дыягностыкі і лячэння традыцыйнай кітайскай медыцыны, а таксама завода па вытворчасці медыцынскіх прэпаратаў супраць каранавіруснай інфекцыі новага тыпу", - адзначылі ў прэс-службе.
Кітайска-беларускі індустрыяльны парк "Вялікі камень" - асаблівая эканамічная зона са спецыяльным прававым рэжымам, размешчаная за 25 км ад Мінска. У "Вялікім камені" зарэгістраваны 68 рэзідэнтаў з 14 краін. Прыярытэтныя для парка напрамкі - машынабудаванне, электроніка і тэлекамунікацыі, біятэхналогіі, фармацэўтыка, новыя матэрыялы, лагістыка, электронная камерцыя, захоўванне і апрацоўка вялікіх аб'ёмаў даных.-0-
