27 жніўня, Мінск /Кар. БЕЛТА/. У план развіцця адстаючых рэгіёнаў Беларусі прапануецца ўключыць 280 праектаў, паведаміў журналістам міністр эканомікі Дзмітрый Крутой у час пасяджэння Прэзідыума Саўміна, дзе абмяркоўваўся гэты дакумент, перадае карэспандэнт БЕЛТА.
"На сёння сфарміраваны пакет з 280 праектаў. Прыкладна 54 праекты будуць створаны з нуля, амаль 80 - гэта інвестыцыі ў дзеючыя вытворчасці і 140 праектаў адносяцца да сферы інфраструктуры (каля 30 працэнтаў - прамысловая інфраструктура, астатняе - сацыяльныя аб'екты)", - расказаў Дзмітрый Крутой.
Мінэканомікі лічыць, што аб'ём інвестыцый, а, адпаведна, і ўсе астатнія паказчыкі (выручка на аднаго занятага, узровень заработнай платы) будуць расці вышэй, чым у сярэднім па абласцях, дзе гэтыя раёны размешчаны.
Паводле слоў міністра, умовы для інвестараў у гэтых адстаючых рэгіёнах - адно з самых дыскусійных пытанняў. "Калі паглядзець, то можна сказаць, што ўвесь пакет прэферэнцый там ужо дзейнічае. Усе раёны падпадаюць пад дзеянне дэкрэта нумар 6 па малых гарадах у сельскай мясцовасці, там свой аб'ём падатковых ільгот. Частка раёнаў мае ўчасткі свабодных эканамічных зон, і там будуць рэалізоўвацца праекты, гэта якраз патрабаванне Прэзідэнта, мы ўвесь раён не зможам аб'явіць СЭЗ, імі будуць аб'яўляцца канкрэтныя вытворчыя пляцоўкі, куды прыйдуць у першую чаргу прамысловыя прадпрыемствы", - расказаў Дзмітрый Крутой.
Паводле яго слоў, больш за 90 працэнтаў праектаў прафінансуюць беларускія інвестары. Астатняе возьмуць на сябе замежныя інвестары, а таксама міжнародныя фінансавыя арганізацыі, якія накіроўваюць сродкі ў першую чаргу на развіццё інфраструктуры, напрыклад, будаўніцтва станцый ачысткі вады ад прымясей жалеза або перавод кацельняў на мясцовыя віды паліва, развіццё альтэрнатыўных відаў энергетыкі. Сродкі Сусветнага банка будуць выкарыстоўвацца для рамонту школ і бальніц.
План развіцця адстаючых рэгіёнаў плануецца зацвердзіць пастановай Саўміна. Яе выкананне будуць маніторыць аблвыканкамы сумесна з урадам.
Акрамя 280 праектаў ёсць яшчэ 224 інвестыцыйныя прапановы. Гэта, па сутнасці, бізнес-ідэі, якія неабходна адпрацоўваць з зацікаўленымі, вызначаць крыніцы фінансавання і тэрміны. Гэта патэнцыяльны пул інвестыцый, якія павялічаць эканоміку гэтых раёнаў", - растлумачыў міністр.-0-
