16 лютага, Мінск /Кар. БЕЛТА/. Як у Беларусі ідуць справы з далучэннем стратных малочных прадпрыемстваў да буйных перапрацоўчых заводаў, расказаў на прэс-канферэнцыі намеснік міністра сельскай гаспадаркі і харчавання Вадзім Шагойка, перадае карэспандэнт БЕЛТА.
"Беларусь уваходзіць у пяцёрку краін - лідараў па экспарце малочнай прадукцыі. У сувязі з гэтым развіццю малочнай галіны ўдзяляецца шмат увагі. У развіццё сыравіннай базы сельгасарганізацый, а таксама паляпшэнне перапрацоўчых прадпрыемстваў укладваюцца істотныя рэсурсы. За апошнія гады нашы прадпрыемствы сапраўды прайшлі істотную мадэрнізацыю дзякуючы выдзеленым сродкам. Першапачаткова практычна ў кожным раёне Беларусі было малакаперапрацоўчае прадпрыемства. Цяпер мы іх звялі да 33 буйных заводаў, і гэты працэс будзе прадаўжацца", - сказаў Вадзім Шагойка.
Ён дадаў, што перапрацоўчыя прадпрыемствы не могуць існаваць самі па сабе, яны павінны ствараць сабе сыравінную базу для атрымання малака і яго перапрацоўкі.
"Вядома, у пэўныя моманты ў прадпрыемстваў могуць узнікаць складанасці, у тым ліку і фінансавыя. Разам з тым пры неабходнасці прымаюцца адпаведныя нарматыўныя дакументы. Напрыклад, развіццё Віцебскай вобласці ідзе ў рамках указа нумар 70 "Аб развіцці аграпрамысловага комплексу Віцебскай вобласці". Некаторым заводам прадастаўлены растэрміноўкі па выплаце, каб знізіць нагрузку на перапрацоўчыя прадпрыемствы. Акрамя таго, прадпрыемствам перапрацоўкі даручана ўмацаваць сваю сыравінную базу. Адзначу, што гэтыя пытанні разглядаюцца на пастаяннай аснове на ўзроўнях вобласці, Мінсельгасхарча і ўрада. Сітуацыя знаходзіцца на пастаянным кантролі", - падкрэсліў намеснік міністра.-0-
