5 красавіка, Мінск /Кар. БЕЛТА/. Якой будзе структура пасяўных плошчаў у 2023 годзе, расказаў на прэс-канферэнцыі намеснік міністра сельскай гаспадаркі і харчавання Уладзімір Гракун.
"Сельскагаспадарчыя арганізацыі Беларусі пачалі правядзенне вясенніх палявых работ. Восенню мінулага года пачалася нарыхтоўка насення, рамонт тэхнікі, закупка адсутных запасных частак, а таксама сродкаў аховы раслін. Акрамя таго, было арганізавана правядзенне навучання нашых спецыялістаў, каб пры надыходзе аптымальных тэрмінаў арганізавана правесці пасяўную кампанію", - сказаў Уладзімір Гракун.
Паводле яго слоў, у бягучым годзе неабходна будзе правесці сяўбу на плошчы 2,3 млн га. Раннія яравыя збожжавыя і зернебабовыя культуры плануецца пасеяць на плошчы 650 тыс., што ў 2,3 раза менш, чым было пасеяна азімых збожжавых восенню.
"Адзначу, што пад азімыя і яравыя збожжавыя ў цэлым па краіне будзе вылучана 2,5 млн га. Так, азімыя былі пасеяны амаль на 1,5 млн га плошчаў. Кукурузу на зерне плануецца пасеяць на 260 тыс. га. З гэтага і будзе складацца наш збожжавы палетак", - растлумачыў намеснік міністра сельскай гаспадаркі і харчавання.
Ён таксама дадаў, што пад цукровыя буракі будзе вылучана 102 тыс. га плошчаў, бульбу плануецца пасадзіць на 26 тыс. га, лён - на 45 тыс. га. Практычна 5 тыс. га плошчаў будзе вылучана пад агародніну, а таксама амаль 1,15 млн га - пад кукурузу, з якой 884 тыс. га - пад фуражную.-0-
